Paglayas sa ICC
Niay kalamboan nga mahimong hangpon ni Presidente Rodrigo Duterte. Mahimo gani nga iyang sundon aron pagduso sa gubat batok sa ilegal nga drugas. Ang South Africa pormal nang nipahibawo sa United Nations (UN) sa ilang tinguha paggawas gikan sa International Criminal Court (ICC).
Ang ICC maoy usa sa langyawng mga institusyon nga nitawag sa atensiyon ni Duterte sa sunudsunod nga patay sa gidudahang mga durugista. Ang pangu nga prosecutor sa ICC nipasidaan nga mahimong kasohan nila si Duterte kon di mabadlong ang mga patay ug kon di masilotan ang mga responsable sa extrajudicial killings. Ang gihimo sa South Africa mahimong makadasig ni Duterte paglingkawas sab sa hurisdiksiyon sa ICC.
***
Isip usa sa mga sakop sa ICC, ang Pilipinas ubos sa iyang hurisdiksiyon. May gahom ang ICC pagsusi sa mga krimen batok sa katawhan kon ang gobyerno sa sakop nga mga nasud magdumili sa pag-imbestigar ug pagbadlong sa pagpamatay ug ubang bangis nga mga krimen.
Bisan ang immunity gikan sa mga kaso, nga kanunayng gipasigarbo ni Duterte nga maoy labing lig-on niyang panagang batok ni bisan kinsa nga namasangil nga nakalapas sa balaod ang iyang pagdasig sa kapolisan ug militar pagpatay sa suspitsadong mga durugista, di makababag sa ICC kon mohinayon gyod pag-asumir og hurisdiksiyon sa EJKs (extrajudicial killings) sa Pilipinas. Apan gipakita sa South Africa nga may lain diayng lusot si Duterte.
***
Ang pahibawo sa South Africa sa paggawas sa ICC nisunod sa hukom sa Supreme Court of Appeal of South Africa nga nakalapas ang nasud sa iyang international ug domestic legal obligations sa pagdumili pagdakop sa pinangita nga kanhi presidente sa Sudan nga si Omar al-Bashir atol sa iyang pagduaw sa Johannesburg niadtong Hunyo sa niaging tuig.
Ang gobyerno maoy niapilar sa hukom sa provincial court pagtuman sa kamandoan sa ICC pagdakop ni al-Bashir nga gikiha tungod sa pagpatay ug pagpanlugos sa Darfur gikan sa 2003 hangtod sa 2008. Gawas sa South Africa, gisumbong sa ICC ngadto sa UN Security Council ang ubang sakop nga mga nasud nga nagdumili pagdakop ni al-Bashir: Chad, Djibouti, Kenya, ug Malawi.
***
Ang Burundi, nga maoy labing unang sakop nga nasud nga nipasar og balaod paggawas sa ICC, wa pang kapadangat og opisyal nga pahibawo sa gumagawas nga UN Secretary General Ban Ki-moon. Gikuwestiyon ang hukom sa South Africa pagbiya sa ICC sa way pagkonsulta sa bay balaoranan.
Nga di problema ni Duterte tungod sa makabungog niyang mayoriya sa Senado ug sa House of Representatives. Nipasidan-an hinuon ang mayoriya sa sakop nga mga nasud sa Burundi ug South Africa nga ang paggawas sa ICC mahimong molawog sa ilang katawhan sa bangis nga kalasangan sa ka way balaod ug pinatuyangan nga pag-abuso sa gahom.
- Latest
