Freeman Lifestyle ( Leaderboard Top ), pagematch: , sectionmatch: 1

Tinola alang ni Mama

“Ayaw…malata…” Daw may mitubay sab apan hagawhaw busa wala kaayo matuhog ni Ramon kun unsa to.

“Beh, ako beh…” Karon medyo klaroklaro na, busa gidip-ig niya ang iyang likod sa pinsa tungod sa banggerahan.

“Ummm…kalami tinoora…” Tingog sa babaye apan dili pamilyar kun kinsa sa iyang mga kaila ang tag-iya.

“Padak-i pa…” Miiknat ang kilay ni Ramon. May susamag til-as kakatol mikuyanap sa iyang tingkoy.

“Oopps…kahalang na.”

“Uy, naunsa man si Tiyo? Kinsa naman sad ron iyang kulukadidang,” nagduwaduwa sa hunahuna ni Ramon kadtong kataposang lili niya’s gingi sa bungbong amakan tungod sa banggera. “Ahaka gyod ning Tiyo, nakabihag na sab,” malisyosong yawit niya ngadto sa iyang kaugalingon sagol kasuya nga dugokon kaayog tsiks ang iyang uyoan.

Freeman ( Article MRec ), pagematch: 1, sectionmatch:

“Humota na. Uhmmm…” sa babaye pa. Wa kapugngi ni Ramon ang pagbukiki pag-usab sa gisukip nga karton sa gatas isip sampong unta sa nakatkat nga gingi sa bungbong amakan.

Uy tambok man. Ni Ramon pa. Nausab na pod diay ang tirada sa akong uyoan. Dabyana na sab. Ahahaha.

“Monching, giwiwi na sab na nimo hap? Kalaki ka lang doh,” pasidaan ni Sokits. “Dali ngari kay ihawon tikaw karon.” Mikarida si Ramon aron dili hiapsan sa iyang uyoan kay niadtong kataposan ra bang iyang nalilian si Tiyo Sokits niya nga nagkalingaw og masa alang sa pan Bisaya kauban ang tinudloan niini nga sakop sa kooperatiba, nahapsan gyod siya’s iyang uyoan sa ikog sa page sa dihang gipanabi niya nga “nagpuli-puli’g kumot” si Sokits ug kadtong hinganlag Sonya, ang nahimong tigbansaybansay sa mga sakop sa Pan-Kabuhayan Program sa usa ka kooperatiba sa ilang purok. Diay to nagpulipulig kumot sa gimasang harina ug sa pagpikaspikas sa igong gidak-on sa ingon makabawi sa puhunan kun ugaling ibaligyag tag P10 ang buok.

“Kinsa to Sir?” sa tambok nga babaye pa.

“Ay, akong pag-umangkon Ma’m. Kusog kaayo manuop nya may pagka-radyo baktas ra ba, morag di lalaking buhat,” tubag ni Sokits.

“Uy hala, basin kuwang sa tagad. Patilawon nya nato Sir,” matod sa babaye.

“Asa na gani ta adto Ma’m,” ni Sokits nga padayong gilista sa nutbok ang detalyadong pamaagi sa pagdalit og lami-ang tinolang manok.

“Ingon ka Bisaya. Ha-it og labok,” mingisi ang babaye.

“Aw o ensakto. Lahi ang Bisaya Ma’m kay dili las-ay ang unod.”

“Ay, padungogdungog man,” reklamo sa babayeng tambok. Nakabahakhak ang duruha.

Retirado na si Sokits sa pagpangusina. Nagsugod siya sa barko gyod. Kadtong inter-island vessel nga diin wala dayon siya madawat kay wala pa siya kailag turmeric. Mao ra diay to, luy-ang amarillo. Sus bilanggotanan! Mao ra diay to, maayo na lang gani kay sa dihang nasakpan ang pagpayuhot sa asukar ug delata sa nadawat nga kusinero, siya gilayon ang gitawagan aron motambong kay dihadiha man ang pagpalagpot sa mahilabtanong kusinero nga marukoy kaayo kay sa balde sa lamaw gihumol ang mga delata aron kuno dili hingsakpan sa mga nagtanghal lang sab nga sikyo.

“Sige balik ta sa sugod, Ma’m ha? Usa ka kilong tibuok manok Bisaya, gibahin ngadto’s igong gidak-on; usa ka gamay’ng hilaw nga kapayas o ba kaha sayote, ginagmay pagkahiwa; duha ka kutsarang luy-a, mahimong gidukdok o tinag-as nga pagkahiwa; tunga sa tasang dahon sa sili o ba kaha dahon sa kamunggay; usa ka litrong tubig; lima ka lusok nga ahos, gitadtad og pino; usa ka ulo sa bombay, pino nga pagkakwadrado; upat ka kutsarang mantika; duha ka kutsarang patis.”

“Inita ang mantika, dayon ilunod ang ahos hangtod medyo motabunon gamay ang bulok, dayon ang bombay ug isunod ang luy-a. Ibubo ang tubig ug ilunod ang manok. Pabukali sulod sa 20 minutos o hangtod maluto ang manok, apan likayi nga malata. Timplahi’g patis. Dayon ilunod ang kapayas ug padayona ang pagpabukal sulod sa lain pang singko minutos o hangtod ang kapayas mohumok apan dili sab mabungkag. Isunod paglunod ang dahon sa sili. Ning higayona mahimo nang pagngon ang kayo. Isilbi nga init pa sa yahong pinaresan sa humay o ba kaha sa bugas mais.”

Matod sa babaye nga sa gagmay pa kuno sila, ang ilang inahan modalidalig buhat og sabaw sa manok panahon nga sila magluya. Epektibo kuno ang “chicken soup” kay napamatud-an na nga maayo kini sa pulmon. Ang mga panakot sama na lang sa ahos ug sili adunay benepisyong ikadalit susamag modernong tambal sa ubo.

Taas ang panahon nga giusik sa babaye kay inay magkat-on sa mga buhat sa kusina ug panimalay, gipili niya ang makigtaban sa gitohoang adunahan. Ang nakaparat kay nabangkarota man ang patigayon sa ginikanan sa lalaki busa napugos sila pagpangita’g ilang kabuhian. Sa kauwaw, wala una mouli ang maong babaye sa ilaha. Namasin usa siya og panarbaho ug tuod man nadawat siya isip store clerk kay may barog man sab siya ug maantigo man sab mokwenta. Apan karon nga masakiton na ang iyang inahan, buot niyang kasuklian ang tanang gipuhunan sa iyang inahan ngadto kanilang magsoon. Ang pag-amuma susama sa gibuhat niini kaniadto kanila panahon nga adunay hilantan ug takigan.

“Hinaot maabtan pa nako si Mama, Sir,” sa babaye pa nga nagsubaysubay sa listahan sa panakot isip halad pasig-uli alang sa maayong kabubut-on. ?

Freeman ( Article MRec ), pagematch: 1, sectionmatch:
  • Follow Us: