PMAer nga taga Dalaguete gipasidunggan
CEBU, Philippines - Gipasidunggan sa Provincial Board ang laing Sugbuanon nga nigradwar sa Philippine Military Academy isip sakop sa Sanggalang ay Lakas at Buhay na Alay Para sa Kalayaan ng Inang Bayan (SALAKNIB) Class of 2017.
Niadtong Lunes gipasar ang resolusyon ni Bokal Jose Mari “Tata” Salvador nga nagdayeg ug nagpahalipay kang 2Lt. Fritz Amaquiton Entoma, taga Lumbang, Dalaguete.
Si Entoma, 23-anyos, ikatulo sa unom ka anak ni Lumbang Barangay Kapitan Benjamin Entoma, usa ka mag-uuma, ug Ma. Elena Entoma, usa ka yanong asawa.
Si Fritz nigradwar sa Lumbang Elementary School ug Casay National High School sa Dalaguete.
Siya nikuha sa kursong Bachelor of Science in Criminology sulod sa duha ka tuig sa University of the Visayas-Main Campus isip working scholar sa wala pa mosulod sa PMA niadtong Abril 2013.
“This exceptional achievement of 2Lt. Entoma is a typical example of the saying, poverty is not a hindrance to success,” matud ni Salvador.
Matud ni Salvador nga gisusi pa nila ang taho nga adunay taga Samboan nga sakop gihapon sa ikaduhang distrito nga nigradwar sab sa PMA.
Niadtong Marso 20 gipasidunggan sab sa PB pinaagi sa resolusyon ni Bokal Alex Binghay si 2Lt. Meriam Libongcogon, usa ka katabang sa panimalay nga taga Biasong, Balamban. (BANAT NEWS)
- Latest
