Pres. Duterte moanhi sa Sugbo ugma?

CEBU, Philippines - Ilusad ugmang adlawa ang Unity for Federalism sa Sugbo diin gipaabot nga tambungan ni Presidente Rodrigo Duterte.

Apan matud ni Rey Duterte Abad, usa sa mga organizers, nga 97 porsiyento pa kung makatambong ba ang Presidente.

Matud ni Abad, kinsa pag-umangkon sa Presidente, nga motunga o dili ang Presidente padayon gihapon ang kalihukan nga gipaabot nga tambungan sa 40 mil ngadto sa 50 mil ka tawo sa hawanan sa University of Southern Philippines, Cebu City.

Ang kalihukan magsugod alas 9 sa buntag hangtud alas 8 sa gabii diin daghang mga national ug local artists ang manambong lakip na ang mga opisyal sa nagkadaiyang nasudnong ahensiya.

Dungag ni Abad nga dili sila mopasalig nga motambong ang Presidente apan tua na sa Malacañang ang usa sa mga igsuon niini aron sa pagkombinsir nga moanhi gyud sa Sugbo.

“Ang Presidente di man na motuman og protocol. Mokalit ra na og adto. Mao na nga hangtud karon padayon ang pagkombinsir niya total kaning Pederalismo iya man gyud ning programa,” matud ni Abad. (BANAT NEWS)