Ginang hinatulan ng habambuhay sa droga
MANILA, Philippines - Habambuhay na pagkakulong ang hinatol ng korte sa isang ginang na miyembro ng drug syndicate habang ang dalawang kasama naman nito ay hinatulan ng 10-15 taon na pagkakulong dahil sa pagbebenta ng shabu na nagkakahalaga ng P5,000.00 sa Taguig City kahapon.
Base sa 32-pahinang desisyon ni Judge Antonio Olivete, ng Taguig Regional Trial Court (RTC), Branch 267, hinatulan nito ng habambuhay na pagkabilanggo si Elisa “Ely” Tinga, nasa hustong gulang, miyembro ng Tinga Drug Syndicate at pinagbabayad ito ng halagang P500,000.00 bilang moral damages at sina Andrea Escalante at Daniel Datinggaling, pawang nasa hustong gulang at miyembro rin ng naturang sinidikato ay hinatulan naman ng 10 haggang 15-taong pagkakulong at pinagbabayad naman ng P300,000.00.
Bukod sa habambuhay na pagkakulong ay hinatulan pa rin si Tinga ng 10 hanggang 15-taong pagkakulong sa isa pang kaso nitong illegal possession of prohibited drugs at pinagbabayad ng P300,000.00.
Sa record ng korte, nadakip ang mga akusado noong Hulyo 2012 sa Kalayaan St., Brgy. Ususan, Taguig City sa isang buy-bust operation na isinagawa ng pinagsanib na pwersa ng Philippine Drug Enforcement Agency (PDEA), District Anti-Illegal Drugs, Southern Police District (DAID-SPD) at Taguig City Police.
- Latest