Hulga sa uwan
Makapabalaka nang daan ang pasidaan ni PAGASA Visayas Director Oscar Tabada nga ang kusog nga uwan nga niigo sa Sugbo ug Kabisay-an gahapon, Lunes, mao gihapon ang mohasol sa tibuok Sugbo ug Kabisay-an karong adlawa, Martes. Mas makahadlok ang mga numero nga iyang gihatag sa gidaghanon sa uwan nga atong mapaabot:
•Hangtod sa 75,000 ka baril sa tubig ang mayabo sa matag metro kuwadrado sa matag oras;
•200 ka litrong tubig ang masud sa matag baril, sa ato pa moabot og 15 milyones ka litro ang mayabo sa matag metro kuwadrado sa matag oras;
* * *
•315 ka kilometro kuwadrado o 315 milyones ka metro kuwadrado ang kinatibuk-ang luna sa Sugbo;
•Sa ato pa, 4,725,000,000,000,000 (wa ka malipat, kapin sa upat ka quadrillion na) ka litro nga uwan ang mobaha sa tibuok Sugbo sa usa lang ka oras o kapin sa 78 trilyones ka litro sa matag gutlo sa tanang dakbayan ug kalungsoran sa Sugbo; ug
•Palihug, ikaw na lay kuwenta kon unsa kadaghan ang uwan sa 24 ka oras o, kon magpadayon gyong uwan tibuok adlaw karong adlawa, sa 48 ka oras.
* * *
Kon matinuod ang banabana sa PAGASA, mahimong moawas ang tanang sapa ug modahili ang tanang bakilid ug mabanlas ang kabalayan daplin sa sapa ug dagat ug kimba. Matod ni Tabada makatabang kon karon pa lang susihon na sa lokal nga mga opisyal ang pagpabakwet nang daan sa mga molupyo nga labing nameligro.
Kay taas pang atong kalbaryo. Matod ni Tabada nga samtang motuang ang uwan ugma, Miyerkules, apan mobalik na sang kusog nga uwan sa mosunod nga upat ka adlaw gikan sa Huwebes hangtod sa Domingo.
* * *
Nipasabot si Tabada nga mas maayo pa unta kon nahimong bagyong Bising ang low pressure area (LPA) kay mahimong nakagawas na unta sa Pilipinas. Apan ang LPA nagtuyuk-tuyok ra, kon kusog ang Amihan mo-us-os sa Samar ug kon mohinay ang Amihan mosaka sa Bicol.
Nihinay na hinuong uwan sa akong pagsuwat ini. Nipahibawo ang PAGASA nga nahilis nang LPA apan nagpabiling hulga tungod sa tailend sa cold front, nga niduso sa init nga hangin pataas nga makamugna og dugang uwan sa panganod.
- Latest
