Warriors sa West Finals

Sinibak ang Jazz 

SALT LAKE CITY - Tuluyan nang tinapos ng Golden State ang kanilang duwelo ng Utah.

Humataw si two-time NBA Most Valuable Player Stephen Curry ng 30 points para akayin ang Warriors sa 121-95 paggiba sa Jazz sa Game Four at kumpletuhin ang four-game sweep sa kanilang Western Conference semiffinals series.

Nauna nang winalis ng Golden State ang Portland Trail Blazers, 4-0 sa first round.

“We gotta good thing going, we're playing well,” wika ni Curry. “Tonight we had an opportunity to seal the deal and thankfully we came out on top.”

Sasagupain ng Warriors sa Western Confe­rence Finals ang mananalo sa semifinals showdown ng Houston Rockets at San Antonio Spurs.

Sa first period pa lamang ay umiskor na ang Gol­den State ng 39 points para kunin ang double-digit lead laban sa Utah.

Hindi naman nagpabaya ang Jazz at nakadikit sa 52-60 sa halftime.

Sa third period ay nagsalpak sina Curry at  Andre Iguodala ng mga three-pointers para ibigay sa 2015 NBA champions ang malaking 93-79 kalama­ngan papasok sa fourth quarter.

At mula rito ay hindi na nakaporma ang Utah.

Isa si Curry sa lima pang Warriors players na naglista ng double figures.

Nag-ambag si Klay Thompson ng 21 points, habang may 18 markers si Kevin Durant.

Tumapos naman si Draymond Green na may triple-double sa kanyang 17 points, 10 rebounds at 11 assists.

Pinamunuan ni Gordon Hayward ang Jazz mula sa kanyang 25 points kasunod ang 18 at 15 markers nina Shelvin Mack at Dante Exum, ayon sa pagkakasu­nod.

Ito ang huling laro ni Hayward para sa Utah sa kanyang paghahanda sa free agency market.