Buwan sa sunog!

Marso na gyud, fire prevention month na. Apan pangulbaan man ang mga tawo sa pagtungtong niining buwana sanglit makasinati man hinoon kita og sagunson nga sunog.

Posible nga gumikan kini sa masinati nato nga kainit sa panahon, ilabi na nga mao kini ang giisip nga summer season, o ting-init dinhi sa nasud nga posibleng ideklarar sa Pagasa sugod sa ikaduhang semana karong bulana hangtod na sa Abril.

Kay init man ang panahon, uga usab kaayo ang palibot ug dali kaayo nga mosilaob bisan malabayan lang og upos sa sigarilyo.

Gawas niini, ang depektoso nga mga wiring sa kuryente nga gipangkitkit na sa ilaga, ilabi na kadtong anaa sa kisame sa balay, ang angayang susihon kay delikado nga magtapot ang positive ug negative kay segurado gyud nga makamugna kini og sunog.

Ang overnight charging sa mga gadgets, sama sa cellphone nga kun masubrahan mobuto, mao gyud ra ba kini ang trend sa mga tapolan ug adik sa paggamit sa gadget nga ipaungot sa charger ang cellphone samtang nag-Facebook hangtod nga makatulgan na lang, pagka delikado.

Ang Bureau of Fire Protection kanunay mipahimangno sa katawhan aron maseguro nga dili mabiktima sa sunog, apan mag-unsa man ang ilang pahinumdom kun dili mag-amping ug magdanghag lang ang katawhan.

Amping lang gyud aron dili kita masugamak sa kabangis sa sunog!

Seguradohon nato nga anaa gyud ang “prevention” kay kun wala kini, mahimo na ang buwan sa Marso nga fire month!