EDITORYAL - Tulay sa kalamboan

Supak gyud si Mayor Tomas Osmeña nga adunay kabalayan diha sa bukana sa Guadalupe River nga maapektohan sa pagmugna og usa ka rampa dihang dapita alang sa pagatukoron nga Cordova-Cebu City Bridge project. Tinuod, katungod sa mayor ang pagproteher sa katungod sa mga lumolupyo dinhi sa dakbayan sa Sugbo, apan kinahanglan unta nga iyang timbang-timbangon kun hain ang makahatag og mas bentaha niini.

Dili malalis nga si Mayor Osmeña isipon nga bayani sa maong mga pamilya, kang kansang panimalay iyang gipanalipdan nga dili maguba sa pagtukod sa rampa sa taytayan. Apan angay’ng hinumdoman sa mayor nga kining mga tawhana anaa gani nagtukod og panimalay daplin sa dagat ug sa sapa nga wala itugot sa balaod.

Ang pagtukod og taytayan nga magdugtong sa Cordova paingon dinhi sa dakbayan dili malalis nga makapalambo kini sa ekonomiya sa Sugbo. Dili maayo nga tungod lang sa pipila ka pamilya mapugngan ang kalamboan sa Sugbo ug supakon gyud ang maong proyekto. Dili man magkuwang si Mayor Osmeña sa iyang katungdanan kun ang mga pamilya nga maapektohan sa proyekto, tabangan niya nga mapahiluna og tukma nga dapit nga adto sila ibalhin.

Sa ingon nga paagi, moasenso pa unya ang ilang pagpuyo ug makalikay na sila sa kanunay’ng kakuyaw nga ilang atubangon kun modagko ang bawod atol sa mga bagyo nga moguba sa ilang kabalayan.

Daghan gyud ang malipay kun matukod na ang tulay nga magdugtong sa Cebu City paingon sa Cordova, ilabi na kun ang usa ka rampa sa taytayan, anha manukad sa Barangay Ermita, kay dali na lang ang pag-agi sa taytayan aron moadto sa Cordova.

Dunay laing rampa nga tukoron adto sa SRP alang sa mga sakyanan nga gikan sa Talisay. Angay kini nga hinuktokan sa mayor tungod kay sa pagtugot niya nga mapapahawa ang maong mga pamilya diha sa ilang nahimutangan, maisip pa kini nga maghatag kanila og mas nindot nga dapit nga ilang permanenteng pinuy-anan.