Unay-unay nga pagsaway
Sa kadaghan na sa iyang mga gipanulti, kay hapit kada adlaw man ang iyang mga diskurso ug pakighinabi sa media, ug sa kadaghan na niyang niusab-usab sa iyang baruganan, dako ang kahigayonan nga moabot ang adlaw nga si Presidente Rodrigo Duterte mao nay mangunay di lang sa pagsaway kon dili sa pagbalikas gyod sa iyang kaugalingong mga pamahayag.
Nalilian ni nato sa iyang pagmando nga bungkagon sa labing daling panahon ang mga checkpoints sa tibuok nasud. Nipasalig siya nga ang checkpoints wa kinahanglana. Nga ang checkpoints gigamit lang sa mga polis sa pagpangilkil. Tungod sa kahumok niyang masuko ug kaabunda sa iyang mga insulto, way nangahas paghunghong ni Duterte nga siya ra sab ang nagmando pagtukod sa checkpoints.
***
Labaw nang way nakapahinumdom ni Duterte nga gihingusgan ang checkpoints dinhi sa Sugbo ug ubang bahin sa nasud di tungod sa kahigwaos sa kurakot nga mga polis kon dili isip kabahin sa iyang deklarasyon sa state of lawlessness human sa pagpamomba sa Davao City niadtong Septiyembre ning tuiga.
Wa say nakasenyas ni Duterte nga wa pa niya libkasa ang duha ka buwan nang deklarasyon bisan nadakpan nang gipasanginlan nga mga responsable sa pagpamomba sa merkado sa Roxas Avenue sa Davao. Tingali tungod sa kadagko na sa iyang mga isyung gituki sa pagduaw sa China ug Japan, nataligam-an ang kabakikaw na siya ra say niunay pagsaway sa usa sa mga bunga sa iyang kaugalingong deklarasyon.
***
Sa matag buntag nakong baktas gikan sa among pinuy-anan sa Consolacion paingon sa ABS-CBN Broadcast Complex sa Mandaue City, malabyan nakong mga polis nga nagduka ug nanginom og kape sa ilang gamayng tolda daplin sa nasudnong highway diin nagtukaw sa tibuok gabii nilang checkpoint.
Pipila nila nipasabot nako nga bisan wa silay nadakpan niinsistir ang ilang kadagkoan nga ipadayon ang checkpoint kay epektibo pa ang deklarasyon sa presidente. Gawas nga giingnan nga way kapuslanan ang ilang pagtukaw, gipasanginlan pa gyod silang Duterte nga mahimong daotan ang katuyoan.
***
Apan unsa man tinuod ang mahimo sa kapolisan? Igo lang sila nga motuman bisan unsay sugo sa presidente. Bahala na kon usahay magkasungi ang kasugoan. Gipasabot mi sa lokal nga kadagkoan sa kapolisan nga nakatabang ang checkpoints pagpugong sa pagpamomba ug susamang mga insidente sa Sugbo.
Nanlipaghong hinuon sila sa kauwaw dihang nideklarar ang ilang hepe, si PNP Director General Bato dela Rosa, nga tinuod ang sulti sa presidente nga wa kinahanglana ang checkpoints ug busa kinahanglan nga bungkagon sa labing daling panahon. Angay hinuong pahimatngonan silang dela Rosa ug kaubanan nga di magpalabi og sunod sa lahap nga sinultihan. Kay way garantiya nga si Duterte di na sab mousab sa iyang baruganan.
- Latest
