Trak nalimbuwad, 4 tipi

CEBU, Philippines - Upat ang ang namatay ug onse ang naangol human usa ka canter truck nga nagkarga og mga utanon ang nalimbuwad diha sa Brgy. Gutlang, Bukiran nga bahin sa Lungsod sa Argao kagahapon sa buntag.

Ang nakalas naila nga sila si  Gemar Pescadero, 8;  Joevenal Neri, 11;  Gelen Pescadero, 28; ug Anastacia Geverola, 65; pulos residente sa Brgy. Obaob sa maong lungsod.

Samtang ang nadala sa tambalanan sa Dakbayan sa Sugbo mao sila si Vicente Fuentes, 45; Marvic Pescadero, 20;  Christine Manila, 35;  Alcunora Albos,58;  Margarita Gerosaga, 45;  Cirila Pantinople, 60; Elson Jay Pescadero, 7;  Rudiegunda Pantinople, 41;, ug Leonila Pescadero.

 Samtang adunay mga biktima nga wala kaayo nakaangkon og kadaut gidala sa Isidro Kintanar Hospital sa lungsod sa Argao.

Sumala pa ni Police Officer 2 Renato Nacaytona sa Argao Police Station puno og karga ang maong sakyanan nga gimaneho ni Edgar Pescadero niadtong tungora aron itumod sa lungsod.

Apan samtang nagdulhog pa kini kalit nga nibasiyo ang brakes niini ug nalahos ngadto sa kimba.

Matud pa ni Kapitan Frederick Lanutan sa maong barangay nga nahinabi sa Banat News, padulong magtumod og mga utanon ang mga sakay niini diha sa Carbon Public Market sa Dakbayan sa Sugbo.

Matud pa niya gisuwayan gyud unta sa drayber pagbangga na lang sa trak diha sa punoan sa kahoy apan naputol kini hinungdan nga nalimbuwad ang maong sakyanan ug nahulog sa ubos hinungdan nga ubay-ubay ang naangol.

Sumala pa ni Lanutan dead on the spot ang manag-inahan nga Pescadero samtang ang driver sa sakyanan nga si Edgar Pescadero luwas ra hinuon kay nakalayat gikan sa sakyanan ug kasamtangan nga nagtingkagol karon sa prisohan.

Si Sergio Fuentes bana sa usa sa mga biktima nitug-an nga matag adlaw nga Martes magtumod og utanon sa Cebu City ang iyang asawa.

Usa sa mga biktima nga si Manila nitug-an nga kalit kaayo ang panghitabo ug mao na lang iyang nasayran nga iyahay na lang og siyagitay ang iyang mga kauban. Si Manila nakaangkon og mga kadaut sa iyang kalawasan sa dihang lakip kini siya nalabay.

Hasta ang mga ambulansiya sa silingang mga lungsod nitabang pagdala sa mga pasahero dinhi sa dakbayan. (BANAT NEWS)