Pradel, Lambayan abante sa semis

CEBU, Philippines - Si Marc Pradel sa University of the Visayas-Pardo campus nangayo una og usa ka oras ug 20 minutos sa wala pa pildiha ang lig-on sab nga si Vhon Tudtud aron pagmartsa ngadto sa boys 18 semifinals sa 22nd JRG Gullas Tennis Cup kagahapon didto sa Naga covered courts.

Bugnaw kaayo ang sugod ni Pradel nga miresulta ngadto sa 1-6 nga kapildihan sa unang set. Apan sa hinay-hinay nakuha niya ang sakto niyang pulso sa ikaduhang set bisan tuod og nag-agi gihapon siya og makuyaw nga dalan sa wala pa makabawos sa iskor nga 7-5 aron pagpuwersa og super tie-break.

Si Pradel padayon nga mipahimus sa iyang momentum aron pagpayukbo ni Tudtud sa labing sikit nga iskor, 7-6.

Samtang nagkalisud si Pradel, si Francis Lambayan sa University of San Carlos wala kaayo paningta kay iyang gilubong si Francis Navales,  6-3, 6-2 sa laing boys 18 quarterfinal match.

Sa boys 16, sila si Vince Lominoque ug Vence Alforque nga parehong varsity sa UV, maoy unang miabante sa semifinals. Si Lominoque mipilde ni Jake Dakay, 6-3, 6-2, samtang si Alforque mipukan sa taga  Bantayan island nga si Lemuel Garbosa, 6-0, 6-1.

Didto sa CitiGreen Tennis Resort sa Barangay Punta Princesa, dakbayan sa Sugbo, ang Australian nga si Ash McKenzie ug Julliana Maravillas nakaangkon sab og luna sa semis. (BANAT NEWS)