2 terorista utas sa encounter
MANILA, Philippines - Dalawang miyembro ng teroristang Maute Group ang napatay habang isa naman ang nasakote makaraang makipagsagupaan ang security forces kaugnay sa tangkang karnapin ang sasakyan ng isang negosyante sa C-3 Road sa Barangay Ubaldo Laya, Iligan City sa Lanao del Norte noong Biyernes.
Kinilala ni Captain Jo-Ann Petinglay, spokesperson ng AFP Western Mindanao Command ang mga napatay na sina Azzam Ampua Tahir at isang alyas Wowie.
Ayon sa ulat, bandang alas-8:45 ng umaga nang harangin at tangayin ang sasakyan ng 36-anyos na negosyanteng si Athelo Adiong.
Walang nagawa si Adiong at kanyang pamilya na pinababa saka tinangay ng mga armadong terorista ang kanilang sasakyan.
Kaagad namang rumadyo sa tropa ng mga sundalo ang nagpapatrulyang tauhan ng 4th Mechanized Battalion matapos na humingi ng saklolo ang pamilya Adiong.
Nakorner naman ng security forces ang sasakyan sa kahabaan ng Camague Road kung saan sumiklab ang bakbakan hanggang sa mapatay ang dalawang terorista.
Arestado naman ang isa pang kasama ng dalawa na si Eyeman Alonto na siyang driver ng sasakyan kung saan nasamsam sa mga napatay ang isang M4 rifle, mga bala at isa pang cal.45 pistol.
- Latest