Crane nahagsa sa balay

CEBU, Philippines - Usa ang naangol human usa ka crane sa bag-ong gitukod nga mall ang nahagsa sa usa ka panimalay diha sa Sitio Guani, Brgy Pahina-Central Miyerkules sa gabii.

Tungod niini gimando sa Office of the Building Officials ang pagpahunong sa trabaho niini samtang gipahunong sa Department of Labor and Employment-7 ang operasyon sa upat ka mga cranes sa maong construction site.

Ang naangol naila nga si Nenita Navasca, 31 anyos, usa ka call center agent nga nakaangkon og mga samad tungod sa pagdagan gumikan sa iyang kalisang.

Matud pa ni Segundina Caban, ang tag-iya sa panimalay diin nahagsa ang crane swerte lang nga diha siya sa gawas kay aduna siyay bisita atol sa hitabo ug nagpasalamat siyang wala pa natulog ang pag-umangkong si Navasca kay nagtan-aw pa og telebisyon.

Gitug-an ni Caban, nipasalig kaniya ang engineer sa construction site nga mapaayo ang iyang balay ug pagpatambal sa iyang pag-umangkon.

Si Konsehal Jerry Guardo tsirman sa Committee on Infrastructure and Urban Planning nibutyag nga adunay liability ang construction firm sa hitabo.

Buot usab niya ipasusi ang ubang mga construction sites pagsusi sa ilang mga gamit aron di kini mahitabo sa uban.

Si Assistant Engineer Joseph Toreja, sa Metro Dyna Build Incorporated (MDBI) nga maoy nag-construct sa mall nipasalig nga motabang sa apektadong pamilya ug mobayad sa mga kadaut nga nahimo sa disgrasya.

Samtang si Acting Office of the Building Official Chief sa Cebu City Engr. Josefa Ylanan nimando sa MDBI pagduso og incident report ug gipahunong una ang tanang trabaho samtang gihimo ang imbestigasyon.

Samtang ang DOLE-7 mipagawas og work stoppage sa upat ka mga cranes sa maong construction site.

Matud pa ni Atty. Roy Buenafe, ang legal officer sa DOLE-7 nga ang pag-operate lang sa upat ka cranes ang ilang gipugngan.

"Ang kadtong natagak kay crawler crane to siya. Bisan wa na siya naka-operate, apil lang gihapon to siya sa work stoppage order," matud pa ni Buenafe.

Matud pa ni Buenafe base sa imbistigasyon sa ilang Labor Laws Compliance Officer nga ang maong crane nikalit lang kini og kahuslo samtang naa kini sa ibabaw.

"Normally ini’g abot sa 80 degrees automatic na siya nga mohunong ang boom sa crane. Pero pag-abot pa lang sa 70 degrees nikalit og kapalos mao nipaling sa luyo unya natangtang ang boom ug nahagsa sa usa ka panimalay," matud pa ni Buenafe.

Nagkanayon si Buenafe nga walay trabahador nga nasakitan sa aksidente. Apan ilang nadiskubrehan nga wala kini construction safety officer ug  walay safety program.

Karong Lunes adunay ipahigayon ang DOLE-7 og mandatory conference sa mga representante sa construction firm.Rowena Capistrano, Decemay Padilla, ug Mitchelle Palaubsanon (FREEMAN)