Pelicans mokuha ni Cousins gikan sa Kings

CEBU, Philippines - Nanghinaut ang New Orleans Pelicans nga  palig-onon ang ilang tsansa nga makasud sa playoff pinaagi sa pagkuha ni power forward DeMarcus Cousins gikan sa Sacramento Kings.

Mao kini ang gibalita sa nagkadaiyang media outlets didto sa Amerika.

Kun ugaling mahinayon, si Cousins maghiusa unya og puwersa ni Anthony Davis nga bag-o pang gipasidunggan nga NBA All-Star MVP human miiskor og 52 puntos.

Dili pa hinuon opisyal, apan gibalita sa Yahoo Sports, ESPN ug USA Today nga ang Kings hapit na mobuhi ni Cousins  bugti nilang rookie guard Buddy Hield, swingman Tyreke Evans, guard Langston Galloway ug ingon man 2017 first-round pick ug 2017 second-round pick nga ilang makuha gikan sa Philadelphia 76ers.

Misamot ang espekulasyon kabahin sa maong isyu human si Cousins miduwa lamang og duha ka minutos sa 192-182 nga kadaugan sa Western Conference sa 66th NBA All-Star Games  kagahapon   didto sa Smoothie King Center.Si Cousins dunay average nga 29.1 points ug 11.2 rebounds matag duwa, apan init og ulo ug usa sa  mga players nga ahente og silot sa liga karon nga season, napitohan na siya og 17 ka technical fouls. (BANAT NEWS)