West nidominar gihapon

CEBU, Philippines - Mihimo og record si Anthony Davis pinaagi sa pag-iskor og 52 puntos sa pagdominar sa West batok sa East, 192-182 sa 66th NBA All-Star Games kagahapon didto sa Smoothie King Center sa New Orleans.

Ang bitoon sa New Orleans Pelicans nga si Davis maoy giilang MVP human iyang gibuak ang karaang rekord ni Wilt Chamberlain nga mikadlit og 42 puntos niadtong 1962 All-Star.

Grabe ang kainit ni Davis nga mipasud og 26 sa 39 niya ka itsada aron pagpapas sa rekord ni

Blake Griffin nga mihimo og 19 ka field goals niadtong 2014.

“I was shocked. I am just happy I was able to take the MVP home in front of home fans,” matud

pa ni Davis.

Wa’y makita nga depensa ang duha ka habig hinungdan nga gipahimuslan kini ni Davis aron pagduslit og 22 puntos sa first half pa lang. Sa unang kuwarter, ang West midalit na og manindot nga pasundayag sa fans ilabi na human si Russell Westbrook yanong nakaiskor gikan sa pasa sa kanhi niya teammate nga si Kevin Durant.  Sa unang duwa diin sila nagkauban ni Durant, si Westbrook miiskor og 41 puntos.

Rekord sab ang tinigum nga 374 puntos sa duha ka koponan ug mao kadto ang ikaduhang sunod-sunod nga tuig nga ang duha ka kampo mibuak sa tinigum nga iskor sa usa ka duwa.

Wala hinuon mahimuot si Golden State Warriors coach Steve Kerr sa kakulang sa depensa sa mga magduduwa ug gusto niya nga ang liga mangita og paagi aron mamahimong hugot ang kompetisyon ug dili kay mura lang og  nagduwa-duwa ang mga players.

“I would like to see it more competitive. It’d be good to have incentives for the guys, get charities involved,” matud pa ni Kerr kabahin sa kakulang sa depensa.

Nangu sa East mao si Milwaukee Bucks center Giannis Antetokounmpo uban sa iyang 28 puntos, samtang ang alas sa Cleveland Cavaliers nga si LeBron James miburak og 23 puntos sa ika-13 niyang salida sa All-Star.

“We had fun and hopefully we put on a show,” matud pa ni New York Knicks star Carmelo Anthony sa pilderong East. (BANAT NEWS)