PNP chief bigyan ng 2nd chance – Lacson
MANILA, Philippines - Nais ni Sen. Panfilo Lacson na bigyan ng pangalawang pagkakataon si PNP Chief Ronald dela Rosa sa gitna ng panawagan na magbitiw na ito dahil sa isyu ng dinukot at pinatay na Koreano sa loob mismo ng Camp Crame.
Sinabi ni Sen. Lacson, mas mabuting bigyan ng second chance si dela Rosa kaysa pagbitiwin sa puwesto.
Aniya, hanggang ngayon ay buo pa rin ang tiwala dito ni Pangulong Rodrigo Duterte kaya dapat bigyan siya ng 2nd chance.
Wika pa ni Lacson, ang mahalaga ay nagpapatupad siya ng reporma sa PNP upang magbago ang mga pulis.
Magugunita na ang dinukot na South Korean na si Jee Ick Joo noong Oktubre 2016 sa Angeles City ay sinasabing dinala at pinatay mismo sa loob ng Camp Crame ni SPO3 Ricky Sta. Isabel.
Maging ang ibang senador tulad nina Sen. Kiko Pangilinan at Ralph Recto ay hindi din pabor sa panawagan na magbitiw ang PNP chief.
“He (dela Rosa) should instead focus on doing his work and limit his attendance in social events,” wika ni Pangilinan.
Sinabi naman ni Sen. Ralph Recto, may isang taon pa si dela Rosa bago ito magretiro sa PNP kaya dapat ibuhos niya ito sa paglilinis ng kanilang hanay.
“The bad press you’re getting is due to bad cops. Thus, it can’t be solved by diversionary tactics but by taking out deeply-rooted reasons,” wika ni Recto.
- Latest
