Mosamot kalig-on

CEBU, Philippines - Usa ka dakung ‘trade deal’ ang gipaukyab sa defending champion Cleveland Cavaliers dihang ilang gikuha si veteran sharpshooter  Kyle Korver gikan sa Atlanta Hawks bugti ang duha nila ka players.

Wala pa hinuon mahingpit  ang maong trade, apan ang matag kampo mismo ang mikompirmar nga pormalidad na lang ang gihuwat sa pagbalhin ni Korver sa Cavs diin mahimo siya makadugang og hait nga hinagiban sa koponan nga gibidahan nang daan sa “Big 3”  nila ni LeBron James, Kyrie Irving ug Kevin Love.

Ang 35-anyos nga si Korver wala na usab gipaduwa sa Hawks sa ilang duwa kagahapon batok sa New Orleans Pelicans nga nagpasabot nga gibuhian na siya sa koponan.

Sa  taho sa  ESPN,  ang  Hawks makadawat sa laing veteran shooter nga si Mike Dunleavy, Mo Williams ug usa ka first round pick sa tuig 2019.

Ang kanhi  “Three-point King'”nga si Korver adunay career-high 42.9 three-point percentage.   Nahimo siyang All-Star niadtong tuig 2015 human siya ang nahimong sinaligang scorer sa Hawks.

Si Korver, kinsa mi-average og 9.6 points karon nga season sama sa grasya gikan sa langit  alang sa Cavs ilabi na nga gipahibalo nga maglisud na pagbalik karon nga season si J.R Smith tungod sa seryosong injury sa tiil.

Sa pagtapon ni Korver sa Cavs, mas misamot pa nga gikahadlokan ang koponan ni coach Tyron Lue tungod kay maatbangan na nila ang mga shooters sa karibal nilang Golden State Warriors. (BANAT NEWS)