Deputy sa CT-TODA nanghasi sulod sa buhatan
CEBU, Philippines - Nangisog dayon labay sa iyang cellphone samtang anaa sa gipatawag nga tigom ang deputy officer sa City of Talisay-Traffic Operation Development Authority (CT-TODA) nga si Almond Keith Dela Peña sa ilang buhatan.
Nahimo niya ang maong aksyon dihang gipahibawo nga dili na ilhon ang iyang pirma sa Human Resource Office.
Nasayran nga niadtong Lunes, gihusay ni Mayor Eduardo Gullas sila si Dela Peña ug si Ret. Gen. Hiram Benatiro kalabot sa pagdumala sa CT-TODA. Si Mayor Gullas nipagawas sa iyang desisyon nga si Benatiro maoy mangulo samtang si Dela Peña ang iyang deputy officer.
Nagtuo si Benatiro nga hapsay na ang tanan apan sukwahi ang iyang pagtuo kay human magka-istorya si Dela Peña ug si Emily Cabrera, ang pangulo sa HR, niluwat kini og pamahayag nga mo- resign sa iyang katungdanan.
Sa paggawas niini sa ilang buhatan, gilabay niya ang iyang cellphone. Nakita ang gipakitang batasan ni Dela Peña sa mga traffic enforcer nga anaa niadtong tungura.
Matud ni Benatiro nga hangtud nga dili pa siya makadawat sa resignation letter ni Dela Peña, ilhon gihapon kini niya nga iyang luyo-luyo.
Iyang giklaro nga insubordination ang gibuhat niini apan dili na siya gustong padak-on pa kini inay iya lang tumanon ang tambag ni Dr. Jomar Rubio nga himuan og incident report ug pahibaw-on ang mayor. Dugang niini nga andam niyang pasayloon si Dela Peña apan niklaro nga dili na sab siya gusto nga buhaton pa kini niya pag-usab. Suway nga gikuhaan si Dela Peña sa iyang habig sa mga tigbalita apan pakyas. (BANAT NEWS)
- Latest