Heat buhi pa

CEBU, Philippines - Nadan-agan pa og gamay ang dalan sa Miami Heat nga makasud sa NBA playoffs human sila miposte og 124-121 nga kadaugan sud sa overtime batok sa Cleveland Cavaliers kagahapon didto sa American Airlines Arena sa Miami, Florida.

Wala hinuon miduwa ang duha ka bitoon sa Cavs nga sila si LeBron James ug Kyrie Irving nga tuyo gipapahuway ni coach Tyronne Lue. Ang resulta, natagak na sab ang defending champion sa ikaduhang dapit sa Eastern Conference diin mainit ang ilang bugno batok sa Boston Celtics alang sa unang puwesto.

Ang Celtics temporaryo karong naghupot sa liderato sa East human ilang gipaksit ang Brooklyn Nets, 114-105.

Samtang ang Cavs natikangkang sud sa overtime sa ikaduhang sunod-sunod nga higayon. Niadto lamang Lunes, naglabaw sila og 26 puntos sa katapusang kuwarter, apan kalit nga mikolapso hinungdan nga gibihag na sab sila sa Atlanta Hawks.

Batok sa Heat, naglabaw gihapon sila og 11 puntos human sa tulo ka kuwarter, 91-80. Apan ang Heat nanginit aron pagpuwersa og dugang singko minutos sa duwa dayon na ngadto sa pagkulit og krusyal nga daog.

Si Tyler Johnson mitali og 24 puntos samtang si Hassan Whiteside dunay 23 puntos ug 18 ka rebounds sa Heat nga mipakgang sa tulo ka sagunson nilang pilde didto sa ilang tugkaran. Labaw sa tanan, nahatagan pa sila og gamay’ng paglaum nga moabante sa playoffs.

Nagbarog karon nga karibal sa Heat alang sa katapusang duha ka luna sa East playoffs mao ang Indiana Pacers ug Chicago Bulls. (BANAT NEWS)