‘Vulcan’ misaad og eksplosibong salida

GENERAL SANTOS CITY, Philippines – Si Raul  ‘Vulcan’  Yu sa tinamod nga ALA Boxing Gym sa Sugbo misaad nga mohimo og eksplosibong salida sa  labing una niyang title fight nga posibleng mahimo niyang hagdanan ngadto sa pagkasikat kun ugaling moguwa siya nga magmadaugon.

Ang 22-anyos nga si Yu makigbinukbukay ni Jade Bornea sa Sanman-Amoy Stable nga nagbasi dinhi sa Gensan alang sa IBF Youth super flyweight title sa main event sa  “Laban Pinoy 3: Rise of Champions” fight card nga naglangkob og upat ka regional championship bouts karong adlawa sa Lagao Gym dinhi sa gibansagan nga Tuna Capital sa nasud.

“Ginerbiyos ko ug ingon man excited,” matud pa sa taga-Butuan nga si Yu sa dihang gipangutana kun unsa’y iyang gibati nga mopakita og aksiyon sa usa ka title match sa unang higayon

“Dili ko makapasalig og knockout kay kaunon ra unya nako ang akoang ipanulti.  Sa boksing man gud, dili ka makatagna kun unsa’y mahitabo. Usa pa, lig-on sab akoang kontra. Ako ikasulti mao nga buhaton nako tanan kutob sa akong mahimo aron nindot ang ikapakita nakong away,” dugang pa ni Yu.

Si  Yu  nga usa ka knockout  artist gumikan kay walo sa siyam niya ka mga biktima iya man nga gipakatug, nagkanayon nga ang iyang pakig-sparring nilang two-division world champion Donnie ‘Ahas’ Nietes, IBF interim flyweight champion Milan ‘El Metodico’ Melindo ug kanhi world champion ‘King’ Arthur Villanueva nakapataas gyud sa iyang kompiyansa sa iyang kaugalingon.

“Daghan ko’g nakat-onan nga leksiyon gikan nila. Mao na nga na-inspire ko og samot nga kab-uton ang akong damgo nga ma-world champion sama kanila sa umaabot,” dason pa ni Yu.

Apan sa dili pa maghuna-huna niana, atimanon una ni Yu si Bornea, usa ka sumusulbong nga bitoon nga wala pa’y pilde sa unom ka away diin upat sa iyang mga daog pinaagi sa knockout.

“Grabe kaayo ang akong preparasyon aning awaya mao nang dili nako makahuwat pa og ugma nga mag-abot nami ibabaw sa ring,”   sumala pa sa 21-anyos nga si Bornea, ang kasamtangang Mindanao Professional Boxing Association (MinProba) super flyweight champion.

Sa dili pa sila si Yu ug Bornea magpinaksitay, tulo ka lain pang title fights nga pulos ubos sa World Boxing Federation ang kumbatihan ning kulbahinam nga promosyon nga gipasiugdahan sa Sanman Promotions ug Solar Sports.

Si Eden ‘Sanman’ Sonsona (35-6-2, 12KOs) makigharong ni Jovany Rota (9-9, 6KOs) alang sa WBF International super featherweight title, ang manghod ni Eden nga si Lolito ‘Thunder Shot’ Sonsona (20-1-4, 9KOs) makigbatok ni kanhi Philippine champion Renren Tesorio (16-9-3, 4KOs) alang sa bakanteng WBF Asia Pacific super flyweight belt, samtang si Ben Manangquil (12-1-2, 3KOs) makigtige ni kanhi  WBO Asia champion Glenn ‘The Rock’ Porras (29-5, 17KOs) alang sa WBF International bantamweight title. (BANAT NEWS)