Kapitan, 8 konsehal suspensuhon

CEBU, Philippines - Suspensuhon sud sa unom ka buwan ang tanang mga opisyal sa Brgy. Ermita subay sa kamandoan sa Visayas Ombudsman tungod sa kasong Grave Misconduct, Gross Neglect of Duty and Conduct of Prejudicial to the Best Interest of the Service nga gipasaka sa Philippine Drug Enforcement Agency-7.

Kini maoy gitug-an ni Philippine Drug Enforcement Agency-7 Regional Director Yogi Filemon Ruiz nga nahinabi sa Banat News. Si Ruiz maoy mipasaka og kaso batok sa maong mga   opisyales.

Matud pa ni Ruiz, Miyerkules sa hapon nakadawat siya sa kopya sa mando sa Ombudsman nga nipahamtang og preventive suspension nila ni Kapitan Felicisimo Rupinta, ug mga konsehales nga sila si Marky Rizaldy Miral, Antonieto Flores, Ryan Jay Rosas, Alio Tamundo, Domingo Ando, Maria Buanghug, ug Wilbert Flores.

Sila gireklamo ni Ruiz nga wala mutabang atol sa ilang gipahigayon nga implementasyon sa search warrants niadtong Nobiyembre 6 sa nilabay nga tuig batok sa mga notadong drug suspects sa ilang barangay.

Sumala pa ni Ruiz 500 metros lang ang gilay-on sa lokasyon sa raid gikan sa barangay hall apan wala’y mga opisyal niini ang nipakita aron mosaksi sa gipahigayon nga search ug inventory.

Si Ruiz mipasidaan nga kasohan usab nila ang ubang mga barangay officials nga di mutabang sa PDEA-7 operations ug kadtong mga barangay officials nga ilang gidudahan nga drug protectors sa ilang barangay.

Samtang si Atty. Rene Burdeos, ang director sa Department of Interior and Local Government nitug-an nga nakadawat na usab siya og order gikan sa buhatan sa Ombudsman apan dili pa nila maimplementar tungod kay iyaha pa nga gipadala sa ilang ulohan nga buhatan alang sa Implementing Order niini.

Matud niya dili makatudlo ang mayor og officer-in-charge kay dili man permanente ang maong kamandoan.

Si Kapitan Rupinta sa iyang bahin nitug-an nga dili makiangayon ang desisyon batok kanila tungod kay wala sila hatagi og kahigayonan nga makatubag sa ilang side.

Matud pa ni Rupinta,adunay niadto nila sa buhatan sa Ombudsman aron mangayo og kopya sa complaint sa PDEA-7 apan wala sila hatagi tungod kay ipa- validate pa sa kaulohan apan giingnan lang sila nga hatagan pa sila og napulo ka adlaw nga motubag.

Apan kagahapon preventive suspension order na ang ilang nadawat ug wala sila hatagi og kahigayonan nga makapadayag sa ilang side, maong mosang-at sila og Motion for Reconsideration ug modangop usab unya sila ngadto sa Court of Appeals.

Si Association of Barangay Council Chairman Philip Zafra nitug-an  nga nahibulong siya nga aduna nay preventive suspension order batok kang Rupinta tungod kay atol sa ilang pag-estoryahay wala man kini gihatagan og kahigayonan nga makatubag. – BANAT NEWS