CT-TODA gibansay aron epektibo sa kadalanan

CEBU, Philippines - Gipaubos na sa training ug seminar ang mga sakop sa City of Talisay-Traffic Operation Development Authority (CT-TODA) aron sila mas epektibo diha sa kadalanan.

Si Hiram Benatiro, pangulo sa CT-TODA nagkanayon nga nalipay siya kay gitubag ang iyang hangyo sa Land Trasportation Office (LTO) nga mapaubos sa seminar ang iyang mga sakop aron hingpit na kining makatabang sa dagan sa trapiko sa Talisay.

Asoy niya nga kamao ang iyang mga sakop apan kinahanglan gyud nga ipaubos sa pagbansay ug seminar aron dili sila magpanagana sa pagpanakop sa mga drayber nga badlungon.

Ang CT-TODA adunay 75 ka sakop kun diin 50 niini anaa sa kadalanan samtang ang uban sa opisina.

Kahinumduman nga si Mayor Eduardo Gullas niingon nga kinahanglan nga paspasan ang training sa mga traffic enforcers kay kuwang sila sa kaisog sa pagpatuman sa lagda sa trapiko ngadto sa mga badlungon nga mga motorista.

Naglaum usab si Benatiro nga unta dunggon ang ilang hangyo sa LTO nga sila matagaan sab og Temporary Operator's Permit (TOP) aron mahadlok gyud ang mga drayber nga magpabadlong kay daku man kini og bayad kun itandi sa citation ticket.

Apan ang kadagkuan sa LTO niingon nga makahatag lang sila og TOP ngadto sa kapolisan ug dili pa sigurado kun matagaan ba ang CT-TODA. Hinuon aduna'y duha ka polis sa Talisay nga anaa nadestino sa traffic division ang aduna na'y TOP.

Nagkasabot na sab ang CT-TODA ug kapolisan nga matag pito ka enforcer kuyogan kini og polis aron magkinto ang mga drayber nga badlungon. (BANAT NEWS)