Uichico gagabayan ang Gilas sa SEAG
TAIPEI – Maghahati ng trabaho ang Gilas Pilipinas coaching staff para sa FIBA Asia Cup sa Lebanon at sa Southeast Asian Games sa Kuala Lumpur, Malaysia.
Si head coach Chot Reyes ang mangunguna sa kampanya ng Nationals sa Asian meet, samantalang si chief deputy Jong Uichico ang hahawak sa koponan sa Kuala Lumpur SEA Games.
Kung maagang masisibak ang Gilas Pilipinas sa knockout phase ng Asian meet ay makakahabol pa ang Gilas program chief sa laro ng Gilas cadets sa Kuala Lumpur.
“Of course, we don’t want that (them flying home early from Lebanon),” wika ni Reyes sa pag-target ng Gilas sa korona ng FIBA Asia Cup kung saan sumegunda ang Nationals sa nakaraang dalawang edisyon ng torneo sa Manila at sa Changsha.
Ang FIBA Asia Cup, itatampok ang mga bagong miyembrong Oceania heavyweights na Australia at New Zealand, ay nakatakda sa Agosto 8-20 at ang SEA Games ay sa Agosto 19-30.
Makakatuwang ni Reyes sa FIBA Asia Cup sina assistant coaches Josh Reyes at Ryan Betia, habang si Jimmy Alapag ang magiging kanang kamay ni Uichico sa SEA Games.
Kabisado naman ni Uichico ang SEAG competition matapos ihatid ang Nationals sa gold medal noong 2009 Myanmar SEAG.
- Latest