Gilas wala na’y ‘chance’

CEBU, Philippines - Lisud na nga makakuha pa og medalya ang Gilas Pilipinas sa 39th William Jones Cup human sila miyukbo sa topseed nga Atletas All-Stars sa Lithuania, 80-91  kagahapon didto sa Taipei Peace International Basketball Hall.

Ang Gilas nakatilaw sa ikatulo nilang pilde sulod sa pito ka duwa nga mibutang kanila sa ikaupat nga dapit.

Aduna pa sila’y  nahibilin nga duha ka duwa batok sa India ugma ug sa Iran sa Domingo.

Bisan pa og modaog sila sa ilang duha ka duwa, lisud na mosulod sila sa top three nga giharian sa Canada, South Korea ug Lithuania nga pulos adunay usa ka pilde sa ilang rekord.

Human sa ilang dominanteng kadaogan batok sa Iraq niadtong Huwebes, ang Gilas mipakita nga andam sila makigbangga sa mas dagkong Lithuanian, apan wala sila kasustinir sa katakus sa ilang kaatbang nga yanong miguba sa ilang depensa.

Nindot unta ang sugod sa batan-ong Gilas diin milabaw sila 12-5 sa first period, apan dali ra kining gipapas sa Lithuanian nga mitapos sa first half sa iskor nga 42-32.

Padayon ang bangis nga opensa sa Lithuania ilabi na sa three-point area aron inaton ang labaw  ngadto sa 20 puntos, 70-50 sa hinapos nga bahin sa third period.

Ang import nga si Mike Myers ug si Kiefer Ravena maoy mibida sa Gilas sa ilang 14 puntos matag usa, samtang ang Sugbuanong si  RR Pogoy ug Fil-American Matthew Wright miiskor og 13 puntos matag usa alang sa Gilas.

Ang Gilas makigsangka sa India karong alas-3 sa hapon. (BANAT NEWS)