‘Twice-to-beat’ tuyo sa Bolts
CEBU, Philippines - Paninguhaon sa Meralco Bolts nga moiskor og krusyal nga daog aron pagseguro nga makuha ang “twice-to-beat” advantage sa playoff sa PBA Commissioner’s Cup.
Ang Meralco kasamtangang nag-una sa standing uban ang 7-1 nga baraha ug ang daog mosegurado kanila sa top two seeds.
Aron ila kining matuman, kinahanglan pildihon sa Meralco ang GlobalPort Batang Pier (2-6) sa ilang duwa karong alas-4:15 sa hapon didto sa Smart Araneta Coliseum.
Dili angay nga mokompiyansa ang Meralco kay ang GlobalPort moparada sa bag-o nilang import nga si Justin Harper nga beterano na sa NBA.
Gawas pa niini, ang Batang Pier nga gusto modaog aron mapalig-on ilang tsansa sa playoffs, nadugangan sab og puwersa sa pagbalhin nila ni Jonathan Grey, Sean Anthony ug Bradwyn Guinto.
Sa main game, ang Star Hotshots ug TNT KaTropa nga pulos adunay 6-2 nga baraha nagtinguha sab nga modaog aron mopadaku sa ilang paglaum alang sa “twice-to-beat” advantage.
Ang duwa sugdan sa alas-7 sa gabii. (BANAT NEWS)
- Latest
