Ahensiya para sa Benham Rise
DUDA ang mga kapwa niya senador sa pakay ni Antonio Trillanes sa pag-usisa sa Benham Rise. Tila gagamitin lang niya ang hearings para akusahan si President Rodrigo Duterte ng pagpapabaya ng 13-milyong-ektaryang likas-yamang saklaw ng Pilipinas sa Pacific Ocean.
Mas mabuti pang talakayin ng Senado ang matagal nang panukala ni Juan Edgardo Angara para sa Benham Rise Development Authority (BRDA). Kailangan ang ahensiya para sa maraming gawain:
l Pag-aralan at imapa ang mga isda at iba pang pagkain-dagat, ang lalim ng tubig sa iba’t ibang parte, at ang pagbagu-bago ng alat, init, at agos ng tubig;
l Suriin kung meron at anong grado ng langis, gas, at minerals doon, tulad ng manganese na sangkap sa maraming kagamitang hi-tech;
l Pangunahan ang pag-aalaga ng likas-yaman, laban sa pagnanakaw ng dayuhan o paglalaspag ng mga Pilipino;
l Lisensiyahan ang mga indibidwal o grupo na mangingisda, magmimina, at aani ng laman-dagat, at kung saan bahagi sila; at
l Bumuo ng mga patakaran para maipamana ang likas na yaman sa mga darating na henerasyon.
Pamumunuan ang BRDA ng Economic Planning Secretary bilang chairman, at ng Administrator bilang vice chairman. Siyam ang board members: ang Secretaries of Environment and Natural Resources, Energy, Agriculture, Science and Technology, Finance, at Tourism, at tatlong taga-pribadong sektor para sa negosyo, academe, at NGOs.
Direkta ito at popondohan ng Malacañang.
Napaka-halaga ng Benham Rise para sa pagkain, kalakal, seguridad, at kinabukasan ng Pilipinas. Hindi ito maisasapalaran sa panandaliang larong-pulitika ng sinuman.
* * *
Makinig sa Sapol, Sabado, 8-10 ng umaga, DWIZ (882-AM).
- Latest
