Mafia nga mobiktima sa mga agawon ipaimbestigar

CEBU, Philippines - Gibutyag ni Presidential Assistant for Central Visayas Michael Lloyd Dino nga posibleng adunay naglihok nga “mafia” nga ang target nga biktimahon mao ang mga tag-iya og mga dagkong negosyo sa Sugbo, ug gusto niya nga kini maimbestigahan.

Matud ni Dino nga personal siya nga nakasinati niining maong kalihukan sa mga mafia diha nga ang mga kawani sa ilang kompaniya kaniadto nga gibayran na sa ilang mga benepisyo, nakamaneho gihapon sa pagpasaka og kaso batok kanila og nangayo na usab og laing bayad.

“When you have a labor case, it does not mean you are labor oppressor. Only that the mafia is out to blackmail the company. Let us avoid syndicated arbitration if we want to promote industrial peace,” matud pa ni Dino.

Gipasabot ni Dino nga kun adunay industrial peace sa trabahoan makamugna kini og inclusive growth ug tinud-anay nga kalamboan nga adto ra pud padulong sa mga trabahante. Apan kun adunay mohulhog sa mga kawani pagpasaka og kaso sagad nga ang mga investors moundang sa negosyo.

Ang mafia nga gipasabot ni Dino mao nga ang abogado sa mga trabahante magkunsabo ug ang Labor arbiter. Si Labor Regional Director Elias Cayanong nagkanayon nga dili niya sakop ang mga labor arbiters ug wala siya masayod sa giingong “mafia” kay ang mga arbiters direkta nga ubos sa National Labor Relations Commission-Regional Arbitration Board-7.

Gitawgan sa Banat News ang opisina sa NLRC-RAB-7 executive labor arbiter aron kakuhaan sa ilang habig, apan wala na kini sa iyang buhatan. Ang pagbutyag ni Dino sa giingong mafia gihimo samtang nagsingabot ang Labor Day. (BANAT NEWS)