Celtics misukarap

CEBU, Philippines - Nasalipdan og  samot ang tinguha sa Boston Celtics nga mailog nila gikan sa mga kamot sa Cleveland Cavaliers ang unang puwesto sa Eastern Conference human sila makasinati og laing kapildihan batok sa Atlanta Hawks.

Ang Celtics nga gilampaso sa Cavaliers niadtong Huwebes, napilde na sab ning higayona sa mga kamot sa Hawks sa iskor nga 123-116  kagahapon didto sa Philips Arena sa Georgia.

Si Paul Millsap miratsada og 26 puntos ug 12 ka rebounds alang sa Hawks nga nagbatog karon sa ikalimang puwesto sa East uban ang 40-38 record.

Samtang ang kaparotan nakapapha sa paglaum sa Celtics nga maapsan ang Cavs alang sa numero unong luna.  Ang Celtics nanaog ngadto sa 50-29, samtang ang Cavs dunay baraha nga 51-27 ug lagmit mao na kini ang topseed sa East padung ngadto sa playoffs sunod semana.

Sa laing duwa, ang Washington Wizards miposte og 106-103 nga daog batok sa New York Knicks aron pagtabla niini sa Toronto Raptors sa ikatulong dapit sa East sa managsamang 48-31 nga baraha.

Samtang si Nikola Mirotic mikadlit og 22 puntos ug si Jimmy Butler midugang og 19 puntos sa dihang gisungag sa Chicago Bulls ang Philadelphia 76ers, 102-90 aron pagpabuhi sa ilang paglaum nga moabante sa playoffs.

Si Butler duna sa’y 10 ka rebounds ug 10 ka assists alang sa ikaupat nga triple-double sa iyang karera.

Ang Bulls ug ang Indiana Pacers nagtige karon sa ikapitong puwesto sa East   parehong 39-40 records. (BANAT NEWS)