‘BITAG solicitations daw? I-entrap n’yo na!’
MULING nagbibigay-babala ang BITAG Media Unlimited Incorporated (BMUI).
Baka may kumakatok na sa mga tanggapan ng gobyerno at pribado para ilambing ang kanila raw team building o outing.
Magpapakilalang konektado sa BMUI o sa Tulfo Brothers para mag-solicit. Magpapadala ng sulat o tatawag sa telepono at magpapakilalang BEN TULFO.
Patuloy kaming nagbibigay ng all points bulletin sa publiko at sa mga nabanggit na tanggapan, hindi nagso-solicit ang BITAG at BMUI kahit kanino.
Hindi ko rin estilo ang tumawag sa mga taong hindi kilala ng BMUI. Bilang lang ang tinatawagan naming pinagkakatiwalaang kaibigan na nakakausap ng harapan o face to face at eyeball to eyeball.
Marami nang nakaabot sa amin na hiningan ng pera ng mga nagpapakilalang BEN TULFO at BITAG kuno lalo na kapag ganitong panahon.
May mga pobreng complainant mula sa iba’t ibang probinsiya na pinangakuang aaksyunan agad ang kanilang reklamo kung magpapadala raw sila ng pera.
Mayroon ding ilang pulitiko na para sa akin, kaya bigay-agad dahil mayroong mga itinatagong katarantaduhan at baho.
Isa sa mga pagkakakilanlan ng mga putok sa buhong nagpapanggap na BITAG o BEN TULFO, hindi lumulutang sa kanilang mga hinihingan. Ikinukubli ang kagaguhan sa telepono at mag-uutos na ipadala na lang daw ang pera sa mga remittance company. Kapag ganyan na ang binanggit, kuwidaw na kayo!
Hindi na bago ang modus na ito subalit marami pa rin ang mga nabibiktima.
Kaya Luzon, Visayas at Mindanao, huwag magpapaniwala sa mga kumakalat na solicitation letter o nanghihingi ng mga donasyon at pera.
Binibigyan ko na kayo ng basbas. Kapag may kumatok sa inyo o humingi ng anumang donasyon, bitagin nyo na!
Abangan ang BITAG Live araw-araw na sabay na napapanood at napapakinggan tuwing alas 10:00-11:00 ng umaga sa Radyo5 92.3 News FM at AksyonTV. Para sa iba pang mga palabas, mag-subscribe sa BITAG OFFICIAL YouTube channel.
- Latest
