AFP magbibigay ng dagdag-proteksyon kay Noynoy atbp
MANILA, Philippines - Nakahanda ang Armed Forces of the Philippines (AFP) na bigyan ng seguridad si dating Pangulong Benigno Aquino III at iba pang mga opisyal laban sa bantang pagpapakilos ng National Democratic Front (NDF) sa kanilang armed wing na mga rebeldeng New People’s Army (NPA) upang dakpin ang mga ito.
Tiniyak kahapon ni AFP Spokesman Brig. Gen. Restituto Padilla na sinabi pang illegal, walang basehan at labag sa batas ang nais ipatupad na pagpapaaresto ng NDF laban sa dating Pangulong Aquino at iba pang nasa “arrest order” ng komunistang grupo.
Bukod kay Aquino kabilang pa sa ipinaaresto ng NDF sa nagkalat na puwersa ng NPA rebels sa Southern Mindanao ay sina North Cotabato Gov. Emmylou Taliño Mendoza, Kidapawan City Mayor Joseph Evangelista, North Cotabato Rep. Nancy Catamco gayundin ang ilang opisyal ng PNP at AFP kaugnay ng madugong pagbuwag sa rally ng militanteng magsasaka sa Kidapawan City noong Abril 1 ng nakalipas na taon na ikinasawi ng isa sa mga raliyista habang marami ang nasugatan matapos na magsalpukan ang nagpang-abot na puwersa ng pulisya at hanay ng mga bayolenteng demonstrador.
- Latest