Lady cop na bumaril sa mister ng ex-girlfriend, sumuko

MANILA, Philippines -  Sumuko na ang isang policewoman na bumaril sa mister ng umanoy dating girlfriend niya sa Novaliches, Quezon, City.

Sinabi ni QCPD director Chief Supt. Guil­lermo Eleazar, na sumuko ang suspek na si PO1 Wealyn Malaya Ojastro,nakatalaga sa QCPD Novaliches Police Station 4  matapos ang apat na araw na pagtatago.

Isinuko din ni Ojastro ang kanyang service firearm.

Si Ojastro ay suspek sa pamamaril kay Mark Kevin Tumbaga, 33, ng Naval St. Brgy Sauyo Novaliches Quezon City, mister ni Glaiza na dating girlfriend ng lady cop.

Lumalabas sa imbestigasyon na naganap ang insidente noong Marso 27 bandang ala-1 ng madaling araw sa mismong bahay ng biktima.

Pinuntahan umano ni P01 Ojastro ang bahay ng mag-asawang Tumbaga dahil patuloy umanong kinukulit ng suspek ang dating girlfriend na si Glaiza subalit dahil may asawa na ito kaya’t pinagsabihan umano ng biktima na tigilan na ang kanyang misis.

Dahil dito kaya nagalit umano ang suspek kung kaya’t binaril ang biktima na tinamaan sa kanang hita at kasalukuyan pa ring ginagamot sa Bernardo General Hospital sa Novaliches. Tinadyakan din ng suspek ang umano’y dating kasintahan na si Glaiza.

Ang suspek ay kasalukuyan nakadetine sa QCPD Novaliches Police Station 4 at nahaharap sa kasong frustrated murder at physical injury at nahaharap din sa kasong  administratibo.