EDITORYAL - Walay labaw sa balaod

Dili gyud maayo tan-awon sa mga mata sa katawhan nga unayon pagsupak ni Cebu City Mayor Tomas Osmeña ang ordinansa nga naglatid sa mga pamaagi sa pag-operate og terminal dinhi sa dakbayan nga siya ra usab ang nag-aprobar niini kaniadtong 2003.

Maisip nga abusado niini ang mayor, bisan pa og sa tinuoray gusto lang niya nga tabangan ang mga sumasakay aron dili kaayo sila masakripisyo nga kinahanglan pa nga molakaw og layo pag-adto sa terminal aron makasakay.

Ang City Ordinance 1958 naglatid nga walay terminal nga tugotang maka-operate dinhi sa dakbayan sa Sugbo kun walay pagtugot gikan sa mga sakop sa Terminal Accreditation Board, ingon man kinahanglang moagi kini sa City Council.

Gilatid usab sa ordinansa nga walay terminal sa mga public utility vehicles nga anha ipahimutang sulod sa 300 metros gikan sa downtown area ug duol sa tunghaan. Kun gusto man gyud sa mayor nga maka-operate ang V-Hire terminal diha sa bakante nga luna sa Barangay Kamagayan, kinahanglan nga pahimoan usa niya og kausaban ang ordinansa.

Kun mapausab sa mayor ang ordinansa ug wad-on ang maong lagda nga gidili ang pagbutang og terminal duol sa downtown area ug tunghaan, mahimo na nga ang V-Hire terminal maka-operate diha sa Barangay Kamagayan.

Klaro kaayo sa balaod nga “Nobody is above the law.” Bisan og mayor ka pa, apan dili mahimo nga supakon nimo ang balaod kay mosangpot ra kini nga mapahamtangan ka og silot tungod sa pag-abuso.

Dili malalis nga ang maong V-Hire terminal nakahatag og dako nga kinitaan sa panudlanan sa dakbayan, apan dili kini angay nga maoy himoong rason aron nga piyungon na lang ang mga mata ug dili mosubay sa balaod.

Adunay mga pamaagi nga mahimong himoon sa mayor aron matuman ang iyang gitinguha, ug ang iyang mga kritiko dili na makahimo sa pag-alkontra.