Tanod nga aktibo sa kampanya sa drugas gipatay

CEBU, Philippines - Patay diha-diha dayon ang usa ka barangay tanod nga aktibo sa kampanya batok sa ilegal nga drugas diha nga gipusil kini sa nag-inusarang kriminal didto sa Barangay Cansaga, lungsod sa Consolacion sayo kagahapon sa buntag.

Ang 50-anyos nga si Wilson Batucan, minyo ug taga Sitio Lapasan nga sakop sa Cansaga, nagpahimutang kini sa iyang motorsiklo samtang gikan siya nga naghatod sa iyang anak sa Consolacion Central School diha nga miatake kaniya ang kriminal.

Si PO1 Macroe Lanurias, desk officer sa Consolacion Police Station, miingon nga ang kriminal nagsul-ob og full-face helmet ug mipusil sa ulo sa biktima makaduha ka higayon.

Diha nga nasukarap na ang tanod, abtik kaayo nga misibat ang gunman luwan sa iyang motorsiklo. Kining maong tanod maoy amahan niadtong 7-anyos nga batang lalaki nga napatay human maigo sa saag nga bala kaniadtong Disyembre.

Atol sa maong higayon ang bata igo lang nagtan-aw og salida sa telebisyon sulod sa ilang balay dihang dunay mga tawo nga nagpabuto og armas nga nakaigo sa biktima. Matud sa kapolisan nga dako kaayo ang posibilidad nga ang tanod gipatay tungod sa kaagresibo niya sa kampanya batok sa mga tigpayuhot og gidiling drugas didto sa ilang lugar.

Hinoon, gitan-aw usab sa mga polis ang posibilidad nga ang biktima adunay kontra ug posible nga maoy mipatay kaniya. Jojo C. Ugdol ug Rowena Capistrano (BANAT NEWS)