Basura sa Talisay pahumotan

CEBU, Philippines - Pahumot alang sa basura maoy nahuna-hunaan nga temporaryong sulbad sa kagamhanan sa Siyudad sa Talisay aron mamenosan ang reklamo sa kabaho sa mga basura nga wala makolekta.

Si Konsehal Manuel Cabriana nga maoy chairman sa committee on solid waste and management, niawhag kang Mayor Eduardo Gullas sa pagpalit og kemikal aron mawagtang ang baho sa mga basura ingon man sa mga garbage truck.

Matud ni Cabriana nga daghang basura sa dakbayan ang nagtipun-og tungod kay pipila lang ka mga garbage truck ang nagamit human nangaguba ang uban. Gumikan niini, ang konsehal nakadawat og daghang reklamo gumikan sa kahugaw ug kabaho sa lugar sa gitapukan sa mga basura diha sa daplin sa karsada.

Ang buhatan sa General Services Office (GSO) ang gisangunan sa pagpalit sa kemikal nga ibutang sa mga basura aron dili kini manimaho.

Asoy pa ni Joan Vebar ang pangulo sa GSO nga iyang susihon ang resolusyon ni Cabriana aron ila na dayong mapalit ang kemikal nga makapawagtang sa baho.  Siya nagkanayon nga nakapalit na sila sa maong kemikal sa niaging administrasyon.

Si Cabriana nidugang nga tungod sa kakuwang sa ilang garbage truck iyang gihangyo ang katawhan nga mosabot lang una samtang nangita pa sila og paagi sa maong suliran sa siyudad. - /DILT) (BANAT NEWS)