Drug free kuno

Dili gyud ko motuo sa pangangkon sa ubang mga opisyal nga kuno “drug free” na ang pipila ka barangay dinhi sa Sugbo. Makasabot ko ngano nga ila kining gipasiatab kay aron ingnon nga may nahimo sila nga kalampusan subay sa ilang mga trabaho.

Drug free? Unsay buot nga ipasabot, wala na’y namaligya’g shabu ug wala na’y tiggamitan og ilegal nga drugas? Wala kaha mo kataw-i sa mga barangay nga inyong gipasiatab nga wala nay problema sa drugas?

Nindot man kun tinuod, apan ang ako ba nga basin og kutob ra sila sa pangangkon. Giunsa man nila pagkahibawo nga wala na gyu’y problema sa ilegal nga drugas sa maong mga barangay?

Kun ang mga kapitan ug ubang opisyal sa barangay mao ra ang nagsulti, kadudahan ang maong inpormasyon. Ang tinuod, bisan gani sa barangay nga nahimutang sa bukid, miabot na ang drugas didto.

* * *

Dasigon pa nako ang mga sakop sa Philippine Drug Enforcement Agency (PDEA)-7 nga ubos sa pagdumala sa akong amigo nga si Director Yogi Felimon Ruiz nga motrabaho pa gyud aron sikupon ang ubang drug pushers nga wala mahadlok sa kampanya nga gilusad ni Presidente Duterte.

Kun mosukol gani, ayaw pagpanagana paggamit sa inyong armas. Kaniadto, kanunay nako nga gitirahan sa akong mga lindog ang PDEA-7 diha nga dili pa si Ruiz ang nagdumala kay  wala’y agi. Nasayod ko ngano nga ang mga sakop sa PDEA kaniadto kanunay’ng nagyugpos ug wala’y gihimo batok sa mga druglord.

Sayonan ka nga samtang ang kapolisan kaniadto aktibo sa kampanya sa drugas ug kanunay’ng nagkapinusilay sa mga drug pushers, ang PDEA mura lang og bungol nga wala makadungog. Usa ka higala nako nga anaa kanunay sa buwangan, mitug-an sa rason nga hilom kaniadto ang PDEA.

* * *

Laing Banco de Oro Branch diha sa Osmeña Boulevard ang giingon nga gamay kaayo og gideklarar nga kita kaniadtong 2014 ug 2015. Sa ato pa, gamay ra usab sila og gibayrang business tax ngadto sa Cebu City Hall.

Tungod kay gipaspasan man ni Mayor Tomas Osmeña ang paggukod sa mga tax evaders dihang miasumer kini sa katungdanan kaniadtong Hunyo 30, ang maong BDO Branch mideklarar na og P2.3 million nga kita sa 2016.

Matud ni Osmeña nga ang P2.3 million mura’g duol-duol na sa tinuod nga kita sa maong bangko. Pero gigamyan ra gyud si Osmeña sa gideklarar nga kita sa maong bangko kaniadtong 2014 nga wala kaabot og P12 mil, unya pagka 2015 wala sab makaabot og P7 mil.

Huwaton nato og unsay mahimong kalamboan niini.