Pusot-pusot nga torneyo sa Chess mosikad karon

CEBU, Philippines - Ang nagpusot-pusot nga torneyo sa chess dinhi sa Sugbo ning bulana mosikad na karong adlawa pinaagi sa pagpahigayon sa 1st Mayor’s Cup Chess Tournament didto sa Minglanilla Sports Complex.

Sugdan ang kumbati sa alas-10 sa buntag. Giorganisar sa Minglanilla Chess Club, Inc. inabagan sa Minglanilla LGU ubos sa liderato ni

Mayor Elanito Peña, ang 7-round Swiss system competition abli lamang ngadto sa mga class B players kon kadtong dunay NCFP (National Chess Federation of the Philippines) rating nga 2000 paubos. Ang makampiyon mobulsa og P3,000, samtang ang mopahiluna sa ikaduha hangtod sa ikalimang puwesto modawat og 2,000, P1,000, P700 ug P500. Ang motapos sa ikaunom ngadto sa ika-10 nga dapit dunay konsolasyon nga P200 matag usa. Dunay   special award nga P500 kadtong top kiddie ug MCCI players.

Human sa Minglanilla, molabyog ang aksiyon didto sa Knight Attack Chess Cafe sa Robinsons Galleria Cebu alang sa “Little Wesley So” Chess Cup karong Marso 12.  Ang maong torneyo nga giorganisa sa Cebu Executives and Professionals Chess Association alang sa mga magduduwa nga nag-edad og 12- anyos paubos.

Karong Marso 18-19, ipahigayon ang ikaduhang edisyon sa binulan nga kompetisyon  nga gipasiugdahan sa Cebu Provincial Sports diha gihapon sa Robinsons Galleria Cebu.

Sa petsa 26, banatan ang March edition sa CEPCA monthly didto sa Knight Attack. Mahuman ang kumbati karong Marso 26 pinaagi sa Talamban Times Square Monthly Active Chess Battle nga naglangkob og open category ug ingon man Under-19 ug Under-13 age groups. (BANAT NEWS)