“Ang Musika ug ako”

Name: Jesson G. Albaran

Nick Name: Jesson

Age: 38

Date of Birth: February 18, 1979

Place of Birth: Cebu City

Favorite Singers: Daryl Ong, Regine Velasquez

----------------

Ang mga kasinatian sa personal nga kinabuhi maoy pipila sa gipakasentro ni Jesson sa pagmugna og pipila ka mga awit.

Mao sab kini ang rason alang kaniya kun nganong paspas siya nga maka-compose og kanta.

Dugang pa niya nga anaa na gyud sa iyang pagkatawo ang daling makahulma og mga lyrics sa awit sanglit bisan sa panahong mobiyahe siya paingon sa probinsiya samtang maglingkod sa bus, dili sama sa uban nga busy sa pagkuti- kuti sa ilang  social media accounts,  makita na lamang niya ang iyang kaugalingon nga nagsuwat sa lyrics sa mga kanta gamit ang iyang cellphone.

Gipabuhagay usab ni Jesson nga usa sa labing dakong hagit sa kinabuhi sa usa ka kompositor mao ang punay og hunahuna kun mauyunan ba kaha sa kadaghanan ang kanta nga iyang gihimo.

Aduna sa'y panahon nga di siya sigurado kun nahatagan ba gayud niya'g igong gibug-aton ang iyang gi-compose nga awit.

Apan bisan pa man, nagpadayon ra gihapon siya sa pagmugna og mga kanta hangtud nga hinay hinay na siyang naila sa Sugbo pinaagi sa pipila ka mga awit nga iyang minugna.

Giawhag sab niya ang mga aspiring young compositors sa pagpadayon sa ilang gibuhat.

Dugang pa niya nga wa niya damha nga usa siya sa nahimong finalist sa Cebu Pop tungod sa kadaghang mga entries nga misumiter sa maong kompetisyon.

Pagpaambit pa niya nga iya ra'ng gisuwayan sa pag-pass og entry sa Cebu Pop ug tuod man dako na lamang niyang kalipay kay usa ang iyang minugna ang napilian sa screening committee.

Sa kalibutan sa musika ug komposisyon nagtuo si Jesson nga kinahanglang ma- feel usab sa interpreter ang matag lyrics sa kanta nga iyang pagaawiton arun sa maong paagi mahatagan og igong hustisya ang kanta.

Gihimong inspirasyon ni Jesson ang tanang mga tawong nagmahal kaniya ug iyang gipahinungod ang matag awit nga iyang gi- compose alang kanila.

Matud niya nga wa pa kaayo siyay mga dagkong pasidungog nga ikapaambit sa kadaghanan sanglit nagsugod pa man ang iyang pagpanimpad sa kalibutan sa pag-compose sa mga awit apan alang kaniya, nahimo siyang hanas dinhi gumikan sa iyang mga kasinatian sa kinabuhi kalabut sa musika.

Dakong kalipay ni Jesson nga nahimo siyang finalist atol sa 37th Cebu Pop Music Festival sa awit niyang"Uyab Ta Pero Di Ta Magsaba" alang sa Huni sa KasingKasing Category nga gi interpret ni Jessa Mae Abaquita.

Alang ni Jesson, dako ang iyang paghigugma sa musika sanglit mao man kini ang butang nga makapalipay kaniya.

Kun ugaling nindot ang musika nga iyang pagapaminawon,mamahimo usab nga mabulukon ang iyang adlaw.

Q and A

BNH: Unsay imong gibati sa dihang nahimo kang finalist sa Cebu Pop?

JESSON: Mao pa ni akong unang gi-compose nga naapil sa Cebu Pop. Nalipay ra ko pag-ayo kay bisag wala ko makakuha sa unang ganti sa among category, daghan ang ganahan ug naka-relate niini. Daghan kaayo ang na- LSS (Last Song Syndrome) sa tono labi na sa chorus nga part. Gikanta-kanta sa mga manan-away paghuman sa competition. Bisag si Ivy Grace Paredes (UK X-Factor) ug Sheryn Regis, gi-cover ni nila.

BNH: Giunsa nimo pagsugod sa pagsud sa kalibutan sa musika?

JESSON: Sa elementary apil ko sa children’s choir sa among school. Hangtud pag-college apil gihapon ko og choir. Pag-graduate nako, naka-decide ko nga maghimo ko og akong choir nga kaugaligon ug mao na nang Voice of Cebu Chorale.

BNH: Unsang panahona ang daghan ka'g ma -compose nga mga kanta?

JESSON: Kasagaran kun mingaw ug walay buhaton o kun mokalit lang og pop-up ang lyrics, i-type dayon sa cellphone aron dili makalimtan. Ang tono dali ra himoon pero ang lyrics nga haom maoy lisod buhaton..

BNH: Giunsa nimo pagpaambit sa imong talent sa religious aspect?

JESSON: Naa mi regular mass service sa akong choir sa Asilo de la Milagrosa Chapel every first Sunday of the month sa 5:30pm.

BNH: Sa unsa nga paagi nga nakatabang nimo'g dako ang Cebu Pop?

JESSON: Na-boost akong confidence to write more songs, dili lang para sa Cebu Pop,  kun dili sa lain  usab  nga mga  song writing competition.

BNH: Kun mahatagan ka'g kahigayunan sa pag-compose og kanta ug ipaawit sa mga nag unang singers sa kauluhan, kinsay imong pilion ug unsa nga klaseng kanta ang imong ipaawit kanila?

JESSON: Si Ivy Grace or si Sheryn akong pakantahon kun babaye. Love song gihapon ug ballad. Pero kun lalaki, si Daryl Ong dayon pop ballad siya.

BNH: May mga panahon ba kaniadto nga hapit na ka mo-undang sa pag compose og mga kanta?

JESSON: Oo kay usahay dili nako mahuman og sulat o usahay pud dili tukma ang tono sa iyang lyrics.

BNH: Sa tanan nimong nahimong interpreter sa imong mga kanta nga gi- compose, kinsa ma'y dili nimo makalimtan ug nganu?

JESSON: Since kini pa man akong unang successful composition, si Jessa Mae Abaquita. Pero sa kadaghan nako'g pwede mahimo ug interpreter, siya jud akong gipili kay kinasingkasing jud siya kun mokanta, mao nga siya akong napilian nga mo-interpret ug wala ko masayop nga siya akong gipili.

BNH: Unsa ang labing dakong leksyon nga imong nakuha sa imong pagka composer?

JESSON: Dili mohunong sa paghimo og kanta. Padayon lang kay moabot ra jud ang para imoha. Kung imoha jud, para jud na sa imo ug walay makaangkon ana.

BNH: Gawas sa imong pagka finalist sa Cebu pop, unsa pay lain nimo nga naangkon nga pasidungog o nadag-an sa natad sa musika?

JESSON: Sa composition/songwriting, mao ni (Cepu Pop) akong pinaka-una. In relation sa choir, ubay-ubay na pud nga mga choir competitions diri sa Cebu nga makadaug sa top prize, usahay runner-up. (BANAT NEWS)