3-1 sakmiton sa Beermen
CEBU, Philippines - Laraw sa San Miguel Beermen nga moposte og 3-1 nga bentaha batok sa igsuon nilang koponan Barangay Ginebra sa Game-4 sa ilang “best-of-seven” finals series sa PBA Philippine Cup karon didto sa Smart Araneta Coliseum.
Ang duwa sugdan sa alas-7 sa gabii.
Nakabentaha ang Beermen, 2-1 human midaog sa Game-3 sa iskor nga 99-88 niadtong Miyerkules ug duha na lang ka daog aron matuman ang gidamgo nilang ‘three-peat’ sa All- Filipino.
Apan si Beermen coach Leo Austria dili pa kontento sa 2-1 nga bentaha ug gusto pa niya kining bingaton ngadto sa tulo.
“Two-one is not a safe lead, but they can’t let us get the 3-1 lead,” matud pa ni Austria sa The Philippine STAR.
Sa dili pa usab ang Game-4, gipaabot na nga modawat sa “Best Player of the Conference” ang Sugbuanong si JuneMar Fajardo.
Tungod niini, gilauman nga inspirado nga moduwa ang three-time MVP sama sa gipakita niyang performance sa Game-3 diin mirehistro siya og 17 puntos ug 18 ka rebounds.
Gawas ni Fajardo, laing mohatag og labad sa ulo ni Ginebra coach Tim Cone mao sila si Arwind Santos, Alex Cabagnot ug Chris Ross nga mipakita sab og maayong salida sa miaging duwa sa Beermen.
Gihinuktokan pag-ayo ni Cone kun unsaon nila pagpugong si Fajardo ilabi na nga si Joe Devance na lang ang sentro. Gisaligan unta niya si Jervy Cruz nga mo-back up ni Devance sa pagdepensa ni Fajardo, apan kadudahan pa kining makaduwa tungod sa injury sa bukton. (BANAT NEWS)
- Latest
