Cavs lupig sa Celtics
CEBU, Philippines - Nagbagang opensa sa katapusang kuwarter ang gihimo ni Isaiah Thomas aron pangulohan ang 103-99 nga kadaugan sa Boston Celtics batok sa defending champion Cleveland Cavaliers bisan pa sa ‘triple-double’ ni LeBron James sa NBA kagahapon didto sa TD Arena sa Boston, Massachusetts.
Miposte si James sa ika-49 nga triple-double sa iyang karera, apan ang alas sa Cavs napuhalan ni Thomas sa maong duwa tali sa labing tadhan nga teams sa Eastern Conference.
Si Thomas nga mipatuasik og 31 puntos, miiskor og singko puntos sa katapusang 49 segundos sa duwa aron pagtuboy sa Celtics sa una nilang daog sud sa tulo ka duwa batok sa Cavs karon nga season.
Gawas nga nagkayo ang opensa, si Thomas duna sa’y lima ka assists, samtang si Jae Crowder mitali og 17 puntos ug milangkat og 10 ka rebounds. Daku sab og naambag si Al Horford nga mipupo og nuybe puntos, 10 ka rebounds ug 10 ka assists alang sa Celtics nga mipakgang sa tulo ka sagunson nilang pilde aron pag-inat sa ilang rekord ngadto sa 39-22.
Sa habig sa Cavs, si James hoyhoy ang mga abaga bisan og miratsada kini og 28 puntos, 13 ka rebounds ug 10 ka assists. Si Kyrie Irving mitampo og 28 puntos, samtang si Tristan Thompson milangkat og 13 ka rebounds sa pilderong koponan.
Sa laing mga duwa, ang New York Knicks mipakgang sa Orlando Magic, 101-90, ang Washington Wizards midaog sab batok sa Toronto Raptors, 105-96, ang Atlanta Hawks midagit sa Dallas Mavericks.
Midaog sab ang Miami Heat pinaagi sa paglubong sa Philadelphia Sixers, 125-98, gilubong sab sa Denver Nuggets ang Milwaukee Bucks, 110-98. Ang New Orleans Pelicans mipakaging sa Detroit Pistons, 109-86, ang San Antonio Spurs nakaipsot sa Indiana Pacers, 100-99.
Ang Minnesota Timberwolves mipukan sa Utah Jazz, 107-80, gilat-an sa Houston Rockets ang Los Angeles Clippers, 122-103 ug ang Brooklyn Nets mipaluhod sa Sacramento Kings, 109-100. (BANAT NEWS)
- Latest
