Tigil-pasada sa Bicol, namayagpag

LEGAZPI CITY, Albay, Philippines - Tagumpay ang sigaw ng Concerned Operators and Drivers for Reform sa Bicol makaraang maparalisa ng kanilang grupo ang biyahe ng mga pampasaherong jeepney sa Albay sa kanilang pakikilahok sa nationwide tigil-pasada kahapon.

Sa pahayag ni Ramon Rescovilla, presidente ng CONDOR-Bicol, umaga pa lang ay umabot na sa 100 percent ang nakilahok sa tigil-pasada sa Albay kung saan tinatayang aabot sa 60, 000 jeepney ang hindi pumasada sa maghapon.

Tinataya aabot din naman sa 80 porsyento sa kabuuan ang naparalisa sa transportasyon ng jeepney sa Kabikulan habang 80 porsyento naman sa bus, 70 sa UV Express at 75 porsyento sa traysikel.

Dahil sa tigil-pasada, ilang PNP trak naman mula sa Camp Simeon Ola kasama ang Army trak ng 9th Infantry Division at mga sasakyan ng LTFRB ang nagserbisyo ng libreng sakay sa mga stranded na pasahero.