AWOL na parak itinumba ng tandem
MANILA, Philippines - Patay ang isang AWOL (absence without official leave) na parak na dating nakatalaga sa Manila Police District (MPD) makaraang pagbabarilin ng riding-in-tandem habang nasa labas ng kaniyang bahay kasama ang kaniyang misis sa Tondo, Maynila, kamakalawa ng gabi.
Kinilala ang biktimang si PO1 Joselito Sumacaton, 37 residente ng F. Varona St., Tondo, Maynila.
Tumakas naman ang mga suspek na sakay ng isang itim na scooter, armado ng mga kalibre .45 baril, kapwa nakasuot ng helmet, itim na jacket.
Sa ulat mula sa tanggapan ni MPD-Station 1 chief, P/Supt. Robert Domingo, naganap ang pamamaril dakong alas-6:10 ng hapon, sa harap ng tahanan ng biktima sa Varona St.
Sa inisyal na imbestigasyon, habang magkatabi sa labas ng bahay ang biktima at maybahay na si Rose Marie Sumacaton nang umalingawngaw ang magkasunod na putok ng baril kung saan bigla na lamang bumagsak sa semento ang biktima.
Nakita pa ni Rose ang riding in tandem na papatakas sa direksiyon ng Dandan St., sa Tondo.
Isinugod sa Mary Johnston Hospital ang biktima subalit hindi nagtagal ay ideklarang patay. Nagtamo ng tama ng bala sa ulo ang biktima na ang point of entry ay sa likod ng ulo at tumagos sa kanang bahagi ng mukha
Patuloy pang iniimbestigahan ni PO3 Jeffrey Laus ng MPD-Homicide Section ang kaso para matukoy ang pagkakakilanlan ng mga tumakas na suspek at matukoy ang motibo sa pamamaslang.
Nabatid na noong nakaraang taon pa nag-AWOL ang biktima na sinasabing ipatatapon sa Mindanao subalit pinili na huwag nang mag-duty.
- Latest