Ragos sa NBI ikukulong

MANILA, Philippines -  Ipinag-utos kahapon ng Muntinlupa City Regional Trial Court (RTC) na ikulong sa pasilidad ng National Bureau  of Investigation (NBI) si dating Bureau of Corrections (BuCor) officer-in-charge Rafael Ragos.

Base sa commitment order na inisyu ni Muntinlupa City RTC, Branch 204, Judge Juanita Guerrero, si Ragos ay ikukulong sa detention facility ng NBI Headquarters sa ilalim ng supervision ng NBI Security Management Section.

Ang kautusan ng korte ay base na rin sa kahilingan ng NBI.

Nabatid, na hindi humarap sa korte si Ragos at tulad ni Ronnie Dayan ay nasa loob lamang ito ng sasakyan.

Mula sa Muntinlupa City RTC, ibinalik din si Ragos sa custody ng NBI.

Nabatid, na noong Linggo ng umaga (Pebrero 26) sumuko si Ragos sa NBI matapos na mapasama ito sa inisyuhan ng warrant of arrest sa sala ni Judge Guerrero noong Huwebes (Pebrero 23) bago mag-alas-4:00 ng hapon.

Matatandaan, na si Ragos ay isa sa mga nagbigay ng testimonya at tumistigo laban kay Senadora Leila De Lima hinggil sa pagkakasangkot nito sa illegal drug trade sa New Bilibid Prison (NBI) ng ito ay kalihim pa ng Department Of Justice (DOJ).

Magugunitang base sa testimonya ni Ragos base sa testimonya nito, na tumatanggap umano ang senadora ng pera mula sa droga.

Subalit, bukod kina De Lima; Dayan at iba pang akusado, kasama si Ragos sa sinampahan ng kaso ng DOJ na may kinalaman  sa bilibid drug trade.