Beer laban sa Gin tagay na

MANILA, Philippines - Nagharap ang mag-utol na Barangay Ginebra at San Miguel Beer sa best-of-five semifinals series ng nakaraang 2016 PBA Governor’s Cup.

Sa likod ni import Justin Brownlee, sinibak ng Gin Kings ang Beermen sa Game Five para laba-nan ang Meralco Bolts na kanilang tinalo sa best-of-seven championship series.

Muling magkukrus ang landas ng Ginebra at San Miguel para sa kampeonato ng 2017 PBA Philippine Cup na magsisimula bukas sa Mall of Asia Arena sa Pasay City.

 Sa kanilang pre-finals press conference kahapon sa Sambokojin restaurant sa Eastwood, Quezon City ay parehong nangako ang dalawang koponan ng umaatikabong laro simula sa Game One.

“Yes, we are sister teams under the SMC Group pero hindi maiiwasan na magbuno kami,” sabi ni San Miguel skipper Arwind Santos.

Determinado ang Beermen na makuha ang Philippine Cup crown sa ikatlong sunod na taon para makamit ang Emilio “Jun” Bernardino Trophy na nauna nang inangkin ng TNT KaTropa dahil sa kanilang all-Filipino ‘three-peat’ mula 2011 hanggang 2013.

Hangad naman ng Gin Kings na wakasan ang kanilang 10 taon na pagkauhaw sa Philippine Cup title at dumiretso sa back-to-back championships matapos pagharian ang 2016 Governor’s Cup.

Ilang beses nang nagkaroon ng title showdown ang San Miguel at Ginebra na ang huli ay noong 2009 Fiesta Conference kung saan hinirang na hari ang Beermen sa pa-ngunguna ni import Gabe Freeman sa Game Seven.

Dalawang beses silang naglaban sa all-Filipino finals na ang huli ay napanalunan ng Gin Kings sa Game Six noong 2007.

“We want to prove we can win it again,” wika ni Mark Caguiao, isa sa dalawang natitirang players – ang isa ay si Jayjay Helterbrand -- ng Ginebra champion team.

“We’re one task short of achieving the goal. We’ll be ready to battle from Game One to Game Seven, the whole 48 minutes or even more if needed,” ani San Miguel guard Chris Ross.

“We’re very happy to be in this position. I can’t wait to get it started,” dagdag pa ni Beermen gunner Marcio Lassiter.

Malinaw na tatayong underdog ang Ginebra na kilalang hindi umaatras sa anumang laban.

“We’re excited going up against San Miguel. They’re going to be a handful for us but we’ll be ready,” sabi ni Caguioa. “There’s a huge task in front of us. We’re taking on obviously the best team in the league. It’s going to be a top battle and we hope to be up to the challenge,” wika naman ni Sol Mercado.