Reusable bags maoy ipagamit
CEBU, Philippines - Ang tanang mga establisamento tibuok probinsiya sa Sugbo giawhag nga magbutang og notice nga mag-agni sa ilang mga kostumer sa pagdala og recyclable reusable bags aron ma-regulate ang paggamit sa plastik.
Bisan pa sa pagdili na og gamit og mga plastik apan daghan gihapon ang wala motuman ug padayon gihapon sa paggamit niini.
Si Bokal Thaddeo Jovito Ouano nagkanayon nga bisan pa sa mga balaod ug ordinansa nga gipalabang batok sa paggamit og mga plastic bag, hangtud karon nasuta nga ang mga plastik pabilin nga usa sa mga hinungdan sa polusyon ug baha sa dakbayan sa Sugbo ingon man ngadto sa ubang mga siyudad sa probinsiya.
Matud ni Ouano nga kinahanglan nga padayon nga edukahon ang publiko samtang ang mga establisamento kinahanglan nga magbutang og mga notisya nga mag-aghat sa mga kostumer sa pagdala og kaugalingon nilang recyclable usable bags aron ma-regulate ang paggamit sa plastik.
Si Ouano misubay sa Section 458(a)(vi), Article III sa Akta Republika 7160 diin nag-empower kini sa Sangguniang Panlalawigan sa pagprotekta sa kalikupan ug mopahamtang og tukmang silot batok sa mga naghimo og kalihukan nga naghatag og peligro sa kalikupan ug mga kalihukan nga moresulta sa polusyon o makaguba sa kasapaan o ecological imbalance. (BANAT NEWS)
- Latest