Jerusalem moaway na alang sa IBF title
CEBU, Philippines - Ang sumusulbong nga bitoon sa ALA Boxing Gym nga si Melvin ‘El Gringo’ Jerusalem moatubang na sa labing lisud nga hagit sa linghod niyang karera sa dihang iyang sangkaon ang wa’y pildeng Thai champion Wanheng Menayothin alang sa WBC minimumweight title karon didto sa Phitsanulok, Thailand.
Bisan tuod og dunay abilidad, dili malalis nga bukid maoy tungason sa 22-anyos nga si Jerusalem gumikan kay gawas nga moaway sa teritoryo sa kontra, dekalibreng kampiyon sab ang iyang atubangon nga si Menayothin nga wala pa’y pilde sa 44 ka away uban ang 17KOs.
Apan ang chief trainer ni Jerusalem nga si Edito ‘ALA’ Villamor nagkanayon nga andam na kaayo ang iyang batos nga mosungasong sa malisud nga misyon.
“Kinahanglan nga impressive gyud siya every round nya kung naay higayon maka-timing, tiwason na lang gyud ang away,” matud pa ni Villamor. “Pero depende na sa outcome sa fight kay naa man sad chance nga makapatumba si Melvin tungod kay naa siya’y power. Kinahanglan lang nga makuha niya ang attention sa judges ug iyang ipakita nga willing gyud siya ma-world champion.”
Si Jerusalem nga wala pa sa’y pilde sa 11 ka away uban ang 7KOs, mopakita’g aksiyon sa langyaw nga lapyahan sa labing unang higayon. Apan dili na bag-o alang kaniya ang makigharong og tadhang kontra ug gani mihimo siya og impresiyon batok nilang kanhi IBF champion Florante Condes ug WBC International light flyweight champion Jonathan Refugio.
“I will do my best and give my all in this fight,” matud pa sa taga-Bukidnon nga boksidor nga
nakakaplag og maayong palad dinhi sa Sugbo ubos sa pagduma sa ALA Gym.
Sa iyang bahin, si Menayothin modepensa sa ikaunom nga higayon sa bakus nga iyang nasakmit human pildiha ang Mehikanong si Oswaldo Novoa niadtong Nobiyembre 6, 2014 didto sa Chonburi provincial gymnasium sa Thailand. (BANAT NEWS)
- Latest