Nabahaan sa Mandaue namalik na sa ilang panimalay

CEBU, Philippines - Pagkaon nga gi-andam sa mga kawani sa City Social Welfare sa dakbayan sa Mandaue maoy gipabawon sa 500 ka pamilya sa wala pa sila mamalik sa ilang tagsa-tagsa ka mga panimalay sa upat ka barangay nga apektado sa pag-awas sa Butuanon River gumikan sa wala’y hunong nga uwan niining semanaha.

Ang kagamhanan sa Dakbayan sa Mandaue uban sa mga opisyales sa barangay nga naapektuhan, mipahimutang sa mga apektadong pamilya sa covered courts ug mga tulunghaan dihang niawas ang nahisgutang sapa niadtong Lunes.

Naglakip ang mga namakwit sa 17 ka pamilya gikan sa Riverside sa Brgy. Canduman,  300 gikan sa Brgy. Paknaan, 63 gikan sa Brgy. Alang-Alang ug 25 sa Brgy. Tabok.

Nag-anam-anam na sila og pamalik sa tuyo nga makapanglimpyo sa ilang mga balay sanglit namatikdan man nga niadtong Martes ug Miyerkules wala na kaayo mobundak ang kusog nga uwan.

Hinuon si Felix Suico, ang pangulo sa City Disaster Risk Reduction and Management Office (CDRRMO) miingon nga nagpadayon ang ilang higpit nga pag-monitor sa panahon ug nagpadayon ang ilang pahimangno ngadto sa maong mga pamilya sa higayon nga subli na usab ang pag-awas sa tubig sa Butuanon River ug Mahiga Creek.

Si Mandaue City Mayor Luigi Quisumbing miingon nga ilang gipaningkamutan ang pagbaton og amphibious dredger nga maoy mohabwa sa yuta sa bukana sa Butuanon River  ug Mahiga Creek.

Dugang pa niya nga iyang gimanduan ang buhatan sa City Engineering Office alang sa pagpadayon sa kaugmaran sa riprap wall sa Butuanon River ug sa Brgy. Paknaan. – BANAT NEWS