Libu-libong pasahero na-stranded: LRT, MRT nagkaaberya
MANILA, Philippines - Libu-libong pasahero ng Light Rail Transit (LRT) Line 2 ang na-stranded matapos maparalisa ng halos mahigit kalahating oras ang operasyon nito dahil sa lumipad na tarpaulin na bumara sa daraanan nito, kahapon ng umaga.
Ayon sa tagapagsalita ng LRT 2 na si Atty. Hernando Cabrera, alas-10:19 ng umaga, pinatay muna ang power ng buong system ng LRT2.
Ito ay dahil nga sa may nakabarang tarpaulin sa daraanan ng train sa may V. Mapa hanggang Pureza sa Maynila, dahilan upang suspendihin ang buong operasyon nito.
Kinailangang pababain ang mga pasahero mula sa train at pinalabas muna sila ng istasyon
Alas-10:30 ng umaga ay ibinalik ang biyahe, mula lamang sa Cubao hanggang Santolan, Pasig City.
Alas-11:10 ng umaga tinanggal ng Engineering Department ng LRT2 ang nakabarang tarpaulin sa kable na daraanan ng train at pagsapit ng alas-11:15 ng tanghali ay bumalik na buong operasyon ng LRT.
Ayon kay Cabrera, posible aniyang galing sa baba ang tarpaulin na nagmula sa mga illegal sidewalk vendor na pawang nagtitinda sa footbridge na malapit sa naturang lugar.
Dahil sa lakas ng hangin lumipad ito sa kable ng LRT 2 na siyang dinadaanan ng mga train.
Samantala, tumirik naman ng dalawang beses ang biyahe ng Metro Rail Transit (MRT-3) kahapon ng umaga na ikinadismaya at ikinagalit ng libu-libong pasahero na naapektuhan ng aberya.
Nabatid mula sa control tower ng MRT-3 na dakong alas-5:15 ng umaga noong magkaroon ng technical problem ang isang tren nila sa North Avenue Station.
Agad na pinababa ang mga pasaherong patungo ng southbound habang hinatak pabalik ng depo ang tumirik na bagon.
Dakong alas-8:04 naman noong magka-aberya ulit ang isa pang tren ng MRT-3 sa GMA-Kamuning station habang ito ay pa-southbound.
Pinababa rin ang mga sakay ng nagka-aberyang bagon sa kabila ng kanilang pagmamadali para makarating sa kanilang destinasyon. Makalipas ang 30-minuto ay muling nagbalik sa normal ang operasyon ng MRT-3. Lordeth B. Bonilla at Mer Layson
- Latest
