4 sikop sa buy-bust, wanted sikop sab
CEBU, Philippines - Nasikop sa mga sakop sa Philippine Drug Enforcement Agency-7 ang duha ka suspetsadong tigpayuhot og ilegal nga drugas sa buy-bust operation sa Dakbayan sa Lapu-Lapu niadtong Lunes.
Nailhan ang suspek nga sila si Markneil Ybales Tumulak alyas Amboy, 33, ug Jovan Medina Tumulak alyas BanBan, 26, parehong nagpuyo sa Purok Kalabasa, Gun-ob sa maong dakbayan.
Nasakmit kang Markneil ang tulo ka tag P100 bill nga buy-bust money ug duha ka gagmay’ng pakete sa shabu samtang nasakmit sab kang Jovan ang usa ka gamay’ng pakete sa shabu.
Kasamtangang nagtingkagol ang mga suspek sa Lapu-Lapu City Police Office holding cell.
Samtang laing duha ka tawo nga nalambigit sa ilegal nga drugas ang nasikop sab sa kapolisan sa buy-bust operation sa Calajoan, Minglanilla diin nasikop sila si Joseph Rafael Madraso, 27, ulitawo ug Marlou Cañada, 32, pulos residente sa maong lugar.
Ang mga dinakpan nakuhaan og upat ka gagmay nga pakete sa shabu lakip ang buy-bust money.
Sa laing bahin, nasikop sa kapolisan si Roy Mayol Sinangote, 31-anyos, taga Maycan, Lawis, San Remigio sa kasong pagpatay.
Si Sinangote nadakpan niadtong Martes sa ala una sa kadlawon sa Purok Tambis, Canjulao, Dakbayan sa Lapu-Lapu pinasikad sa warrant of arrest nga giluwatan ni Judge Antonio Marigomen sa Regional Trial Court, Branch 61, sa Dakbayan sa Bogo. Lendilyn Alquilos ug Rowena D. Capistrano (BANAT NEWS)
- Latest