Japanese language at culture itinuturo ng TESDA sa nurses, caregivers
MANILA, Philippines – Bilang paghahanda sa kanilang pagtungo at pagtatrabaho sa Japan ay itinuturo ng Technical Education and Skills Development Authority (TESDA) ang lenguwahe at kultura ng naturang bansa sa mga nurses at caregivers na nakatakdang umalis ng Pilipinas.
Ayon kay TESDA Director General, Secretary Guiling “Gene” Mamondiong, sa pamamagitan nito ay matututunan ng ating mga kababayan na magtutungo sa Japan ang kaugalian ng mga Hapones para na rin maging madali sa mga ito ang pakikisalamuha sa kanilang makakasama sa trabaho at maging sa kanilang mga magiging employer.
Umabot sa 191 nurses at caregivers ang kasalukuyang dumadaan sa pagsasanay na sinimulan noong November 4 ng kasalukuyang taon kung saan ay dadaan sa anim na buwang pag-aaral ang mga nagpatala para sa Japanese language culture and training.
Dumalo sa ginanap na simpleng welcome ceremony si Ambassador of the Embassy of Japan Kasuhide Ishikawa na nagsabi pa sa mga mag-aaral na upang maging matagumpay sa pagtungo sa kanilang bansa ay kinakailangang maging dalubhasa ang mga ito sa kanilang lengguwahe at kultura.
Hinikayat naman ni Mamondiong ang mga estudyante na pag-aralang mabuti ang lenguwahe at kultura ng mga Hapones nang sa gayon ay hindi mahirapan ang mga ito na makibagay sa bansang pupuntahan at pagtatrabahuhan.
Ang mga nakapagpatala sa anim na buwang pagsasanay ay ika-siyam na batch para sa mga Filipino health workers na dadaan sa National Language Skills Institute ng TESDA kung saan ay umabot na sa 971 ang nagtapos sa naturang pagsasanay na sinimulan noong 2011.
- Latest
